लोकतान्त्रिक समाजवादी पार्टी (लोसपा)का नेता राजेन्द्र महतो सर्लाही–२ बाट चुनाव लड्ने भएका छन् । २०७४ को चुनावमा धनुषा–३ बाट चुनाव जितेका महतो आगामी चुनावमा भने सर्लाही–२ बाट प्रतिनिधि सभा सदस्यको उम्मेदवार हुने भएका छन् ।

धनुषा–३ बाट एमालेकी जुली महतोले चुनाव लड्ने भएपछि महतो सर्लाहीबाट चुनाव लड्न लागेका हुन् । महतोले आगामी चुनावमा सर्लाही–२ बाट उम्मेदवार बन्न लागेको लोकान्तरलाई जानकारी दिए । 

‘आगामी चुनावमा सर्लाही–२ बाट उम्मेदवार बन्ने निश्चित गरेको छु । धेरैलाई म कहाँबाट उम्मेदवार बन्छु भन्ने चासो र द्विविधा थियो । अब त्यो स्पष्ट भएको छ’, महतोले भने । 

२०७४ को चुनावमा कांग्रेसका नेता विमलेन्द्र निधिसँग प्रतिस्पर्धा गर्न गएको र अहिले विमलेन्द्र उम्मेदवार नै नहुने भएपछि धनुषाबाट फर्किएको उनले बताए । 

त्यसबेला महतो राष्ट्रिय जनता पार्टी नेपाल (राजपा) बाट उम्मेदवार थिए । उक्त चुनावमा निकटतम प्रतिद्वन्द्वी निधिलाई २ हजार ९१४ मतले महतोले जितेका थिए । महतोले ३० हजार ७४२ मत ल्याएका थिए भने निधिले २७ हजार ८२८ मत पाएका थिए ।

मंसिर ४ मा हुने चुनावमा लागि निधि कांग्रेसको समानुपातिकतर्फको उम्मेदवार बनेका छन् । 

‘विमलेन्द्रसँग प्रतिस्पर्धा गर्न धनुषा गएको थिए । अहिले उनी उम्मेदवार नै नहुने भनेका छन् । अब म त्यहाँ उम्मेदवार भइरहनु आवश्यक भएन’, महतोले भने, ‘सर्लाही–२ का शुभचिन्तक र मतदाताले गृह जिल्ला फर्कनुपर्छ भन्ने दबाब दिएको कारण सर्लाही–२ बाटै चुनाव लड्ने निर्णय लिएको हुँ ।’ 

अर्कोतर्फ, एमालेबाट उम्मेदवारी दाबी गरेकी जुली महतोसँग राजनीतिक प्रतिस्पर्धा नगर्ने सहमति रहेको पनि महतोले खुलाए ।

जुली महतोले पहिल्यैदेखि चुनाव लड्नको लागि राजनीतिक तयारी गरिरहेको र अहिले उनीसँग आफूले प्रतिस्पर्धा नगर्ने सोचेको महतोले बताए । 

जुली महतो एमाले नेता रघुविर महासेठको श्रीमती हुन । उनले धनुषा–३ बाट उम्मेदवार बन्ने तयारी गरेको भए पनि एमालेले भने अहिलेसम्म उम्मेदवार तय गरिसकेको छैन । उनी गैरआवासीय नेपाली एवं व्यवसायी उपेन्द्र महतोको सहोदर बहिनी पनि हुन् । 

अघिल्लो चुनावमा महतोले एमालेको सहयोग पाएका थिए । लोकतान्त्रिक समाजवादी पार्टी (लोसपा) र एमालेले चुनावी तालमेलको लागि संवाद अघि बढाइरहेका छन् । 

एमालेसँग चुनावी सहकार्यको संवाद निश्कर्षमा पुग्न बाँकी रहेको महतोले बताए । ‘चुनावी तालमेलको लागि एमालेसँग संवाद भइरहेको छ । तर, निश्कर्षमा पुगिसकेको छैन’, उनले भने ।