जुम्लाको कनकासुन्दरी गाउँपालिका–५ वारेकोटडाँडा बस्ने गणेशबहादुर शाहीको घर पहिरो बगाउँदा एकै परिवारका ५ सहित ७ जनाको मृत्यु भएको छ । पहिरोमा परी दुई जना घाइते भएका छन् । 

नेपाली सेनाका अनुसार पहिरोमा परी ज्यान गुमाउनेहरूमा कन्कासुन्दरी गा.पा–५ बस्ने ५५ वर्षका गणेशबहादुर शाही, उनका छोरा २२ वर्षका रमेश बहादुर शाही, बुहारी २२ वर्षकी पानसरा शाही, नातीहरू ९ वर्षका, अनमोल र ६ वर्षका मिलन शाही रहेका छन् । त्यस्तै गणेशबहादुरका छिमेकीहरू  २४ वर्षका सुरेन्द्र हमाल र २२ वर्षकी विद्या शाहीको पनि मृत्यु भएको सेनाले जनाएको छ । 

उनीहरू सबैको शव पहिरोले पुरेका अवस्थामा फेला पारिएको थियो । सेनाले उक्त शवहरू बाहिर निकालिएको जनाएको छ । 

पहिरोमा परी ५० वर्षकी सरस्वती हमाल, २२ वर्षका रामबहादुर हमाल घाइते भएका छन् । उनीहरूलाई सोमवार दिउँसो नेपाली सेनाको हेलिकप्टरमार्फत उद्दार गरी कर्णाली प्रदेश अस्पताल सुर्खेतमा ल्याइएको छ । उनीहरूको सोही अस्पतालमा उपचार भइरहेको छ । घाइतेको अवस्था सामान्य रहेको नेपाली सेनाले जनाएको छ ।