विभागीय टोली त्रिभुवन आर्मी फुटबल क्लबले पोखरामा जारी नवौं राष्ट्रिय खेलकुद प्रतियोगिताअन्तर्गत पुरुष फुटबलमा सुखद् नतिजा निकालेको छ । पोखराको गोस्टेघाट खेल मैदानमा शुक्रवार आर्मीले लुम्बिनी प्रदेशमाथि ४–१ को जित निकाल्दा जारी प्रतियोगितामा सुखद् नतिजा निकालेको हो । आर्मीको जितमा जर्ज प्रिन्स कार्की, भरत खबास, दिनेश हेन्जन र नवयुग श्रेष्ठले समान एक÷एक गोल गर्दा लुम्बिनीका चेतन थारुले एक गोल फर्काए ।

गोस्टेघाटमा शुरुवातदेखि नै दबाब दिएर खेलेको आर्मीले एकपक्षीय खेल देखाएको थियो । सोही क्रममा खेलको पाँचौं मिनेटमा दिनेश हेम्जनको गोलमा आर्मीले अग्रता लिएको थियोे । २४औँ मिनेटमा लुम्बिनीले आत्मघाती गोल गर्दा आर्मीले पहिलो हाफमा २–० को अग्रता लिएको थियो । दोस्रो हाफमा थप दुई गोल गर्दै आर्मीले सहज जित निकालेको हो ।

खेलको ४७ औं मिनेटमा जर्ज प्रिन्स कार्कीले गोल गर्दै अग्रता तेब्बर बनाउँदा ५० औं मिनेटमा लुम्बिनीका चेतन थारुले गोल गर्दै अग्रता छोट्याउने प्रयास गरे । तर बलियो आर्मीबिरुद्ध लुम्बिनीले खेलमा फर्कन गरेको प्रयास असफल रह्यो । आर्मीका नवयुग श्रेष्ठले ९२ औं मिनेटमा गोल गरे ।

पुरुष फुटबलको पहिलो दिन बिहीवार एनआरएनए र वागमती प्रदेशले विजयी शुरुवात गरेको थियो । एनआरएनले प्रदेश १ लाई २–० र वागमती प्रदेशले मधेशलाई २–० ले हराएको थियो ।