नेकपा एकीकृत समाजवादीका अध्यक्ष माधवकुमार नेपालले केपी ओलीले चुनाव जिते देश छाडने हिँड्नुपर्ने अवस्था आउने दाबी गरेका छन् । सत्ता गठबन्धनले बुटवलमा आयोजना गरेको भेलामा बोल्दै नेता नेपालले ओलीलाई हेर्दा नयाँ तानशाह र हिटलरको जन्म भएजस्तो लाग्ने बताउँदै उनीसँग होसियार हुनुपर्ने आवश्यकता रहेको बताए । 

‘ओली सुध्रिनेवाला छैनन् । नयाँ तानाशाह र हिटलरको जन्म भएको जस्तो छ । होसियार रहनुहोस् । बहुमत ल्याए भने देश छोडेर भाग्नुपर्छ । उनीसँग प्रतिगामी शक्तिसँग साँठगाँठ छ । इतिहासको रक्षानमा फालिएको शक्तिसँग उनको साँठगाँठ छ’, उनले भने । अधिनायकबादीलाई रोक्न एकताबद्ध भएर लाग्न नेपालले कार्यकर्ताहरूलाई आग्रह गरे । 

हालै एमाले छाडेका घनश्याम भुसालले एमाले सुधार्छु भन्दै बसेर साबुनपानीले ओलीलाई धुँदा–धुँदा सफाइ गर्न नसकेपछि उनी आफैँ पार्टी छाडेर हिँडेकाे बताए । पाँच दलबीच भएको अहिलेको एकता स्वभाविक रहेको बताए । 

विरोधीले गर्ने नानाभाँती कुराको खण्डन गर्न उनले आग्रह गरे । अहिलेको गठबन्धन अग्रगामी भएको दाबी गर्दै उनले प्रतिगामीलाई पराजित गर्नुपर्ने बताए । ‘संविधान क्षतविक्षत हुने थियो । संविधान मासिने थियो । संघीयता अहिले रहने थिएन । हामीले देशलाई निकै ठूलो संकटबाट बचाएका छौँ । हामीले जोखिम नउठाएको भए राजनीति अस्थिरता हुने थियो’, अध्यक्ष नेपालले भने । 

गठबन्धनका उम्मेदवारलाई इमानदारिताका साथ जिताएर देशको सान बढाउन नेपालले आग्रह गरे ।