रूपन्देहीलाई विकासमा ‘रोलमोडल’ बनाउने योजनासहित एमाले रूपन्देही–२ ले प्रतिबद्धता पत्र ल्याएको छ । 

जिल्लामा सञ्चालित विकासका  निर्माणाधीन योजनालाई पूरा गर्ने र सम्पन्न परियोजनाको प्रभावकारी कार्यान्वयन गर्ने प्रतिबद्धतामा समावेश गरिएको छ । 

आइतवार बुटवलमा प्रतिबद्धता पत्र सार्वजनिक गर्दै एमाले उपाध्यक्ष तथा रूपन्देही–२ का प्रतिनिधिसभा सदस्य पदका उम्मेदवार विष्णु पौडेलले रूपन्देहीलाई विकासको नयाँ उचाइमा पुर्‍याउने गरी आफूले जनतासमक्ष घोषणापत्र ल्याएको बताए । 

घोषणापत्र १४ वटा क्षेत्रलाई समेटेर २५ पृष्ठको रहेको छ ।  

कालीगणडकी–तिनाउ डाइभर्सन, तिनाउ–दानव नदी कोरिडोर, गौतमबुद्ध अन्तर्राष्ट्रिय विमानस्थलमा ट्रमिनल भवन निर्माण, बुटवलमा मेडिकल कलेज स्थापना लगायतका योजनाहरुलाई समेटिएको घोषणापत्रमा समेटिएको छ । 

एमाले उपाध्यक्ष पौडेलले तिनाउ– दानव करिडोर क्षेत्रमा पर्ने बासिन्दाहरूलाई व्यवस्थित र सुविधा सम्पन्न क्षेत्रमा स्थानान्तरण गरेर मात्रै योजना अघि बढाइने बताएका छन् । 

पौडेलले प्रतिवद्धता पत्रमा सार्वजनिक गरिएको कुराहरु पूर्ण कार्यान्वन गरिने प्रतिबद्धता समेत व्यक्त गरेका छन् । 

बुटवल, तिलोत्तमा, सैनामैना, सिद्धार्थनगर, देवदहलगायत समग्र रूपन्देही र पश्चिम नवलपरासीका त्रिवेणी, बर्दघाट, रामग्रामदेखि कपिलवस्तुका तिलौराकोट, कृष्णनगर, शिवराजसम्मको क्षेत्रलाई समेटेर बृहत् लुम्बिनी विकास गुरुयोजना तयार गरी कार्यान्वयन गरिने जनाइएको छ । 

तिलौराकोट, रामग्राम, देवदह, सैनामैनालगायतका पौडेलको प्रतिवद्धतापत्रमा ऐतिहासिक एवम् पुरातात्विक महत्वका बुद्धकालीन सम्पदा क्षेत्रको उत्खनन, संरक्षण र विकास गरिने उल्लेख गरिएको छ ।

यस्तै बृहत् लुम्बिनी क्षेत्रअन्तर्गतका सहरहरूलाई उच्चस्तरीय एवं आधुनिक सडक सञ्जालबाट जोडिने छ र सुविधायुक्त सार्वजनिक यातायात सञ्चालन गरिने प्रतिबद्धता पत्रमा उल्लेख गरिएको छ । 

गौतम बुद्ध अन्तर्राष्ट्रिय विमानस्थललाई पूर्ण क्षमतामा सञ्चालन गरिने जनाउँदै प्रतिवद्धता पत्रमा उल्लेख गरिएको छ ।

‘यस आयोजनाको दोस्रो चरणअन्तर्गत अत्याधुनिक अन्तर्राष्ट्रिय टर्मिनल भवन, समानान्तर ट्याक्सी वे लगायतका पूर्वाधार निर्माण गरिने छ’ पौडेलले भने, ‘विमानस्थलबाट संसारका विभिन्न मुलुकहरूमा सुविधाजनक हवाई यात्रा र नेपाली उत्पादनलाई अन्तर्राष्ट्रिय बजारमा निर्यात गर्ने व्यवस्था मिलाइने छ ।’

यसअघि पनि सोही क्षेत्रबाट प्रतिनिधित्व गरेका पौडेलले प्रतिवद्धतापत्रमार्फत पूर्व–पश्चिम राजमार्गको बुटवल–नारायणघाट र बुटवल–गोरुसिङ्गे–चन्द्रौटा खण्डलाई अत्याधुनिक छ लेन सडकमा स्तरोन्नति गरिने जनाएका छन् । 

यस्तै, सिद्धार्थ राजमार्गको बुटवल–सुनौली खण्डको राजमार्ग चौराहदेखि गोलपार्कसम्मको बाँकी काम यथाशिघ्र सम्पन्न गरिने जनाइएको छ । 

सो पत्रमा भनिएको छ, ‘सिद्धार्थ राजमार्गको सिद्धबाबा क्षेत्र र पूर्व–पश्चिम राजमार्गको दाउन्नेमा सुरुङ मार्ग निर्माण गरी सञ्चालनमा ल्याइने उल्लेख गरिएको छ । पूर्व–पश्चिम राजमार्गको बुटवल स्थित तिनाउ नदीमा आकर्षक एवम् आधुनिक डिजाइनको सिग्नेचर पुल निर्माण गरिने छ ।’

यस्तै निजी क्षेत्रको लगानीमा केबुलकार सेवा सञ्चालन हुन लागेका नुवाकोट, वसन्तपुर र आसपासको क्षेत्रलाई हिल स्टेसन र रमणीय पर्यटकीय स्थलमा विकास गरिने उल्लेख गरिएको छ । 

यसैगरी पुरानो बटौली बजारलाई आधुनिक सुविधा र प्राचीन स्वरूपको ऐतिहासिक सहरमा पुनरुत्थान तथा विकसित गरिने छ । 

जितगढी र नुवाकोट गढीको उत्खनन, संरक्षण र विकास गरी आकर्षक पर्यटकीय स्थलका रूपमा विकास गर्ने जनाइएको छ ।

बुटवलको अमरपथ, पुल्चोक, गोलपार्क, ट्राफिक चोकलगायत चिडियाखोलादेखि पुष्पलाल पार्कसम्मको क्षेत्रलाई भूमिगत पार्किङ, व्यवस्थित ढल निकास, उच्च गुणस्तरका हरियाली सडक तथा पेटी, विद्युत र टेलिफोनको भूमिगत प्रसारण र बहुतले व्यापारिक भवनसहितको सफा र आधुनिक सहरमा विकास गरिने लगायतका योजना उल्लेख छन् । यहाँ एमाले, राप्राप र जसपाबीच चुनावी तालमेल छ ।