गृहमन्त्री बालकृष्ण खाँणले निर्वाचनमा ५ दलीय गठबन्धन अगाडि रहेको बताएका छन् ।

गठबन्धनबाट पाएको सूचनाअनुसार हालसम्मको स्थितिमा ५ दलीय गठबन्धन १३० ठाउँमा अग्रस्थानमा रहेको उनको दाबी छ । 

नेकपा एकीकृत समाजवादी रुपन्देही क्षेत्र नम्बर ३ निर्वाचन परिचालन कमिटीले मंगलवार भैरहवामा आयोजना गरेको अगुवा कार्यकर्ता भेलामा रुपन्देही–३ बाट प्रतिनिधिसभा उम्मेदवार समेत रहेका कांग्रेसका केन्द्रीय सदस्य खाँणले गठबन्धनको अग्रता निर्वाचन हुने दिनसम्म अझै बढ्ने र अत्याधिक बहुमत प्राप्त हुने विश्वास व्यक्त गरे । 

माधव नेपाल प्रधानमन्त्री र आफू सिँचाइमन्त्री भएको बेला रुपन्देहीमा विकासका आयोजना अगाडि बढेको उल्लेख गर्दै उनले सहमति र सहकार्यका साथ गठबन्धनलाई अगाडि बढाएर मुलुुकलाई आगामी ५ वर्षभित्र आर्थिक रूपमा पनि विकसित बनाइने उल्लेख गरे ।

अर्को प्रसंगमा उनले नेत्रविक्रम चन्द ‘विप्लव’ नेतृत्वको नेकपालाई शान्तिपूर्ण मतदानमा सहभागी गराउन विप्लव समूह र सरकारबीच निरन्तर छलफल भइरहेको बताए । राजनीतिक मूलधारमा ल्याउन सरकार र विप्लव समूहबीच द्विपक्षीय वार्ता भएको जानकारी दिँदै उनले नेकपाका प्रवक्ता खड्गबहादुर विश्वकर्मासँग २ दिनअघि भैरहवामा भएको वार्तामा कारागारमा रहेका बन्दीलाई प्रक्रिया मिलाएर छाड्ने, मुद्दा फिर्ता लिने लगायतका विषयमा छलफल भएको बताए ।

गृहमन्त्री खाँणले नेकपाका नेता कार्यकर्तासमेत निर्वाचनमा भाग लिन खोजे प्रशासनले धरपकड नगर्ने र अन्य नागरिकसरह मतदान गर्ने अवसर दिने प्रस्ताव गरेको उल्लेख गरेका छन् ।