शिक्षा, विज्ञान तथा प्रविधिमन्त्री देवेन्द्र पौडेलले बागलुङकै नागरिकलाई पाहुना भनेको भन्दै एमाले अध्यक्ष केपी शर्मा ओलीमाथि खनिएका छन् । बुधबार तमानखोला गाउँपालिकामा भएको चुनावी सभालाई सम्बोधनका क्रममा उनले मतदातामा भ्रम छर्नका लागि ओलीले आफूलाई पाहुना भनको भन्दै आक्रोश व्यक्त गरेका हुन् । 

“म यही जिल्लाको माटोमा जन्मिएर यहीँ ठाउँको विकाशका लागि ज्यान दिए लागेको मान्छे हुँ । झापाका ओलीले पाहुना भन्नु एमालेको हारको मानसिकता हो” उनले भने । 
केही दिन अघि नेकपा एमालेको चुनावी सभालाई सम्बोधन गर्न बुर्तिबाङ आएका ओलीले प्रतिनिसभा सदस्यका विपक्षी उम्मेदवारलाई पाहुनाको संज्ञा दिएका थिए । 

पौडेलले बागलुङका ६ वटै सिट गठबन्धनले जित्ने दाबी पनि गरे ।  “बागलुङका ८५ वडाहरुमध्ये गठबन्धनले ७० वडाहरुमा जित हासिल गरेको छ, उनले भने, यही आकडाले पनि गठबन्धनको जित भइसक्यो, औपचारिकताका लागि आम नागरिकले निर्वाचन मिति पर्खनुपरेको हो ।” 

 पौडेलले आगामी निर्वाचनपछि संघ र प्रदेशमा गठबन्धनको सरकार बन्ने पनि बताए । कार्यक्रममा संविधान सभा सदस्य निरज पुनले बागलुङ क्षेत्र नम्बर २ का उम्मेदवार देवेन्द्र पौडेल र एमाले उम्मेदवारबीच तुलना हुन नसक्ने टिप्पणी गरे ।