अर्थविद्हरूले विराटनगर पुगेर २०७४ सालमा डा. शेखर कोइरालाले निर्वाचन हारेर ठूलो राजनीतिक दुर्घटना भएको बताएका छन् ।

कांग्रेस युवा नेता एवं राष्ट्रिय योजना आयोगका पूर्व उपाध्यक्ष डा. स्वर्णिम वाग्लेले विगतमा डा. शेखर कोइरालाले निर्वाचन हारेर ठूलो राजनीतिक दुर्घटना भएको बताए ।

‘डा. शेखरले २०७४ सालमा निर्वाचन जितेको भए अहिले राष्ट्रिय राजनीतिको परिस्थिति अर्कै हुने थियो,’ वाग्लेले भने । 
कांग्रेस केन्द्रीय सदस्य एवं राष्ट्रिय योजना आयोगका पूर्व उपाध्यक्ष डा. गोविन्दराज पोख्रेलले शेखर कोइराला केही गर्न सक्ने ईच्छाशक्ति भएको नेता भएको बताए । राजनीति भित्रको विकृति हटाउन पनि डा. शेखरको भूमिका जरुरी रहेको उनले बताए ।

नेपाल सरकारका पूर्व मुख्य सचिव डा. विमल कोइरालाले डा. शेखर कोइरालासँग मुलुकको भविष्य जोडिएको बताए । उनले भने, ‘देश बनाउन महाभारतको कृष्ण आउँदैनन्, शेखरहरूले नै मुलुक बनाउने हो ।’

नेपाली कांग्रेस विराटनगर महानगर कार्यसमितिले आयोजना गरेको ‘समसामयिक आर्थिक अवस्था र नेपाली राजनीति’ विषयक अन्तर्क्रियामा उनीहरूले आफ्नो धारणा राखेका छन् ।