प्रतिनिधिसभा सदस्यमा जाजरकोटबाट नेकपा माओवादी केन्द्रका शक्तिबहादुर बस्नेत र सल्यानबाट नेकपा एकीकृत समाजवादीका प्रकाश ज्वाला निर्वाचित भएका छन् । उनीहरू दुवै सत्ता गठबन्धनका साझा उम्मेदवार हुन् । 

जाजरकोटबाट प्रतिनिधिसभा सदस्यमा निर्वाचित भएका बस्नेतले नेकपा एमालेका निरज आचार्यलाई ९ हजार ३१ मतान्तरले हराउँदै जीत निकाले ।

बस्नेतले ३४ हजार १५१ मतले विजयी हुँदा उनका निकटतम प्रतिस्पर्धी आचार्यले २५ हजार १२० मत प्राप्त गरे । यसअघि उनी जाजरकोट–१ बाट २०७० सालको संविधानसभा निर्वाचन र २०७४ सालमा जाजरकोटबाट प्रतिनिधिसधा सदस्यमा निर्वाचन भएका थिए । पूर्व गृहमन्त्री बस्नेत माओवादी केन्द्रका उपमहासचिव हुन् ।

सल्यानमा प्रतिनिधिसभा सदस्यमा गठबन्धनविरुद्ध बागी उम्मेदवारी दिएका राजेन्द्रबहादुर शाहलाई १५ हजार ९११ मतान्तरले पराजित गर्दै प्रकाश ज्वाला निर्वाचित भएका छन् । ज्वालाले ३५ हजार ७०० मतले विजयी हुँदा स्वतन्त्र उम्मेदवार शाह (पुतली चिह्न) ले १९ हजार ७८९ मत प्राप्त गरे ।

यहाँ ८४ हजार २२ मत खसेको थियो । ज्वाला एकीकृत समाजवादीका उपमहासचिव र कर्णाली प्रदेशको पूर्व आर्थिक मामिला तथा योजनामन्त्री हुन् । उनीविरुद्ध एमालेले उम्मेदवार उठाए पनि निकट प्रतिस्पर्धामा आउन सकेनन् । एमालेका राजेन्द्रवीर रायले १३ हजार २९ मत प्राप्त गरेका छन् ।