प्रतिनिधिसभा सदस्य निर्वाचनमा यसपटक सबैभन्दा बढी मतान्तरले चुनाव जित्नेको पहिलो नम्बरमा राष्ट्रिय स्वतन्त्र पार्टीका सभापति रवि लामिछाने भएका छन् ।

उनी नेपाली कांग्रेसका उमेश श्रेष्ठसँग ३४ हजार १६५ मतान्तर कायम गर्दै विजयी भएका हुन् । लामिछाने ४९ हजार २६१ मत ल्याएर विजयी भएका छन् । 

मतान्तर धेरै बनाउने दोस्रो नम्बरमा भक्तपुर–१ बाट प्रेम सुवाल रहेका छन् ।

नेपाल मजदुर किसान पार्टी (नेमकिपा) का नेता सुवालले नेकपा एमालेका नवराज गेलाललाई ३० हजार ७९३ मतान्तरले जितेका छन् । सुवाल ४२ हजार ७६१ मत ल्याएर प्रतिनिधिसभा सदस्यमा विजयी भएका हुन् । 

लामिछानेले सबैभन्दा बढी मतान्तर ल्याएर जितेको भए पनि देशैभरका प्रतिनिधिसभा उम्मेदवाहरूमध्येमै धेरै मत ल्याउनेमा नेकपा एमालेका अध्यक्ष केपी शर्मा ओली छन् ।

ओलीले ५२ हजार ३१९ मत ल्याएका छन् । यो यसपटकको प्रतिनिधिसभा निर्वाचनमा कुनै पनि उम्मेदवारले ल्याएको सबैभन्दा बढी मत हो ।

नेपाली कांग्रेस झापाका अध्यक्ष डा. खगेन्द्र पाण्डव अधिकारीलाई २८ हजार ५७६ मतान्तरले हराएका ओलीले यसअघि पनि २०७४ सालमा उनै अधिकारीलाई २८ हजार ८०० मतान्तरले जितेका थिए । यसपटक उनको मतान्तर घटेको हो । 

यसपटक प्रतिनिधिसभा सदस्य निर्वाचनमा लामिछाने, सुवाल र ओलीपछि सबैभन्दा बढी मतान्तर बनाउनेमा माओवादी केन्द्रका नेता वर्षमान पुन छन् । पुनले एमालेका पूर्ण बुढामगरलाई २५ हजार २२९ मतान्तरले जितेका छन् । वर्षमान ४१ हजार ७१४ मत ल्याएर विजयी भएका छन् । 

सप्तरी–२ बाट निर्वाचित भएका जनमत पार्टीका अध्यक्ष चन्द्रकान्त राउत (सीके) ले जसपाका अध्यक्ष उपेन्द्र यादवसँग १८ हजार ६३ मतान्तर बनाएका छन् । राउतले ३५ हजार ४२ मत ल्याउँदा यादवले १६ हजार ९७९ मत ल्याएका छन् ।

राष्ट्रिय स्वतन्त्र पार्टीकी डा. तोसिमा कार्कीले नेकपा एमालेका अमृत खड्कालाई १८ हजार १७३ मतान्तरले हराएकी छन् । कार्कीले ३१ हजार १३६ मत पाउँदा एमालेका खड्काले १२ हजार ९६३ मत ल्याएका छन् । 

नेपाली कांग्रेसका राजेन्द्र बजगाईंले पनि एमाले उम्मेदवारसँग १६ हजार ६७० मतान्तरले जीत हासिल गरेका छन् । बजगाईं ३३ हजार ४२८ मत ल्याएर गोरखा–१ बाट विजयी भएका छन् ।

नेकपा एकीकृत समाजवादीका प्रकाश ज्वालाले पनि स्वतन्त्र उम्मेदवार राजेन्द्रबहादर शाहसँग १५ हजार ९११ मतान्तरले जीत हासिल गरेका छन् । ज्वाला सल्यान–१ बाट ३५ हजार ७०० मत ल्याएर प्रतिनिधिसभा सदस्य चुनिएका हुन् । 

कांग्रेसका विश्वप्रकाश शर्माले पनि नेकपा एमालेका अग्निप्रसाद खरेललाई १४ हजार २७५ मतान्तरले जितेका छन् । शर्माले झापा–१ बाट प्रतिनिधिसभा सदस्य जितेका हुन् । 

मतान्तर बढी बनाउनेमा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ पनि छन् । उनले राष्ट्रिय स्वतन्त्र पार्टीका उम्मेदवार कवीन्द्र बुर्लाकोटीसँगको प्रतिस्पर्धामा १३ हजार ४६६ मतान्तरले जितेका छन् । दाहालले गोरखा–१ बाट जितेका हुन् ।

नेपाली कांग्रेसका सभापति शेरबहादुर देउवाले पनि स्वतन्त्र उम्मेदवार सागर ढकाललाई १२ हजार ४९२ मतान्तरले जितेका छन् । देउवाले २५ हजार ५३४ मत ल्याएर डडेलधुराबाट सातौंपटक संसदको यात्रा तय गरेका छन् । 

नेपाली कांग्रेसकै रमेश लेखकले पनि एमाले उम्मेदवारलाई १२ हजार ७५ मतान्तर बनाएर जितेका छन् । लेखकले ३० हजार ५२३ मत ल्याएर कञ्चनपुर–३ बाट जितेका हुन् । 

एकीकृत समाजवादीका कृष्णकुमार श्रेष्ठले नेकपा एमालेका उम्मेदवारलाई १० हजार ६६ मतान्तरले जितेका छन् । श्रेष्ठ २९ हजार ५०५ मत पाएर बारा–४ बाट प्रतिनिधिसभा सदस्यमा निर्वाचित भएका छन् ।