कालीकोटमा नेकपा माओवादी केन्द्र प्रतिनिधिसभा र प्रदेशसभामा समानुपातिकतर्फ पहिलो पार्टी बनेको छ ।

मंसिर ४ गते सम्पन्न प्रतिनिधिसभा र प्रदेशसभा सदस्य निर्वाचनमा समानुपातिक मतको शनिवार राति सकिएको मतगणनाअनुसार माओवादीले अग्रता कायम गरेको हो ।  

प्रतिनिधिसभा १ र २ प्रदेशसभा निर्वाचन क्षेत्र रहेको जिल्लामा नेकपा एमाले दोस्रो र नेपाली कांग्रेस तेस्रो दल बनेका छन् । जिल्लामा निर्वाचनको मतगणना सकिएको यसको नतिजा सार्वजनिक भइसकेको मुख्य निर्वाचन अधिकृत भरत लम्सालले जानकारी दिए ।

मुख्य निर्वाचन कार्यालयका अनुसार माओवादीले प्रतिनिधि सभामा समानुपातिकतर्फ १४ हजार २२९ र प्रदेशसभातर्फ १५ हजार २५१ मत पाएको छ । एमालेले प्रतिनिधि सभातर्फ १२ हजार ५६४ र प्रदेश सभातर्फ १२ हजार ३३९ मत पाएको छ ।

कांग्रेसले प्रतिनिधि सभामा १० हजार ५८५ र प्रदेश सभातर्फ ९ हजार २० मत समानुपातिकमा पाएको छ ।

नेकपा एकीकृत समाजवादीले प्रतिनिधि सभातर्फ २ हजार ५६, प्रदेश सभामा २ हजार १२१, नेपाल मजदुर किसान पार्टीले प्रतिनिधि सभामा १ हजार २४०, प्रदेश सभामा १ हजार ५०७, राष्ट्रिय प्रजातन्त्र पार्टीले प्रतिनिधि सभामा १ हजार २७३, प्रदेशसभामा १ हजार ८८२ मत पाएको छ ।

जिल्लामा प्रतिनिधि सभामा उम्मेदवार नउठाएको राष्ट्रिय स्वतन्त्र पार्टीले समानुपातिकतर्फ ६०१ मत पाएको मुख्य निर्वाचन अधिकृतको कार्यालय कालीकोटले जनाएको छ । जिल्लामा ४६ हजार ६६९ मत खसेको मुख्य निर्वाचन अधिकृत लम्सालले जानकारी दिए ।