नेपाल राष्ट्र बैंकका प्रवक्ता डा. गुणाकर भट्टले मौद्रिक नीतिको पहिलो त्रैमासिक समीक्षा व्यवसायी जगत र बैंक तथा वित्तीय क्षेत्रका सुझावहरूलाई मध्यनजर गरी तर्जुमा गरिएको बताएका छन् । वर्तमान मुलुकको अर्थतन्त्र परेको दबाब तथा व्यवसायिक वातावरण सहजता बनाउने गरी मौद्रिक नीति ल्याएको उनले बताए । 

मौद्रिक नीतिको समीक्षाको विषयमा प्रतिक्रिया दिँदै डा. भट्टले मुलुकको वर्तमान समग्र आर्थिक स्थितिमा दबाब रहेकाले त्यही अनुरुप मौद्रिक नीतिको समीक्षा आएको स्पष्ट पारे । उनले अर्थतन्त्र दबाब हुँदाहुँदै पनि आन्तरिक आर्थिक क्रियाकलापलाई सहज बनाउन आवश्यक रहेको बताए । उनले पछिल्लो असोज महिनाको अर्थतन्त्रको तथ्याङ्कअनुसार बाह्य दबाबमा सहजता देखिए पनि अन्य फण्डामेन्टल विषयहरूमा अझै अफ्ठ्यारो अवस्था रहेको बताए । 

राष्ट्र बैंकले पछिल्लो एक वर्षदेखि विनिमय सञ्चिति,व्यापार घाटाको अवस्था बारेमा सुक्ष्म अध्ययन गरिरहेको जानकारी दिँदै प्रवक्ता भट्टले अर्थतन्त्रमा भोलिको दिनमा आउनसक्ने अप्ठ्यारो अवस्थालाई केन्द्रमा राखेर मौद्रिक नीतिको समीक्षा गरिएको बताए । उनले राष्ट्र बैंकले लिएका नीतिगत व्यवस्थाहरूले अर्थतन्त्र लयमा आएको भन्ने विषयलाई मौद्रिक नीतिको समीक्षाले आत्मासाथ गरेको दाबी गरे । उनले अन्तर्राष्ट्रिय परिस्थिति अझै अनिश्चित रहेकाले भोलिका दिनमा अर्थतन्त्रमा समस्या आउनसक्ने विषयलाई राष्ट्र बैंकले महसुस गरेर नीतिगत व्यवस्था त्यहीअनुसार बनाइरहेको बताए । 

प्रवक्ता भट्टले व्यवसायिक र औद्योगिक वातावरण तथा सर्वसाधरणहरूमा ब्याजदरको विषय उत्पन्न भएको संशयलाई सम्बोधनका विषयलाई मौद्रिक नीतिको समीक्षामा सम्बोधन गरिएको बताए । उनले मौद्रिक नीतिमा वाणिज्य बैंकहरूको स्पेडदर ४.४ प्रतिशत मात्रै हुनुपर्छ भन्ने व्यवस्थालाई अब ४ प्रतिशतमा सीमित राख्नुपर्छ भनेर बाटो खुला गरेको बताए । भट्टले विकास बैंक र वित्त कम्पनीहरूले  ५ प्रतिशतको स्पेडदरलाई ४.६ प्रतिशतमा कायम गर्ने नीतिगत व्यवस्था गर्नु व्यवसायिक वातावरणलाई सहज बनाउनको लागि महत्वपूर्ण निर्णय गरिएको बताए । उनले मौद्रिक नीतिको समीक्षामा बैंकले जारी गरेको चालु पुँजी मार्गदर्शन कार्यान्वयनमा देखिएका समस्या समाधान गर्ने संकेत गरेको बताए । 

प्रवक्ता भट्टले बैंकहरूको ब्याजदरमा स्थायीत्व ल्याएर सन्तुलन कायम गर्नु र अर्थतन्त्रको मौलिक विशेषता र वित्तीय क्षेत्रको अवस्थालाई ध्यानमा राखेर मौद्रिक नीतिको समीक्षा आएको बताए । उनले बजारमा चरम तरलता अभावको कारण बजार ब्याजदर उच्च भएको बताए । उनले तरलता सहजता बनाउने माध्यम भनेको विदेशी विनिमय सञ्चिति भएको बताए । 

प्रवक्ता भट्टले बाह्य क्षेत्रमा सुधार भएर शोधानान्तर स्थिति सहज हुने बित्तिकै तरलता सहज हुने बताए । उनले तरलता सहज भएमा ब्याजदर पनि विस्तारै घट्दै जाने बताए । उनले बैंकको ब्याजदर बजारले नै निर्धारण गर्नुपर्छ भन्ने विषयमा राष्ट्र बैंक सहमत रहेको बताए । उनले मौद्रिक नीतिको समीक्षाले बैंकको नाफा घटाउने काम भन्दा पनि बैंक तथा वित्तीय क्षेत्रको अवस्था बलियो हुनुपर्छ भन्ने विषयमा राष्ट्र बैंक दृढ रहेको बताए । उनले बैंकहरूको वित्तीय स्थायित्व दृढ नभई वित्तीय स्थायित्व कायम हुन नसक्ने बताए । भट्टले बैंकहरूले आफ्नो कार्यकुशलतालाई अभिवृद्धि गरी बैंकको लागतमा व्यवस्थापन गर्न सक्नुपर्ने सन्देश दिएको बताए । 

प्रवक्ता भट्टले राष्ट्र बैंकले जारी गरेको चालु पुँजी कर्जा मार्गदर्शन कार्यान्वयनमा गएको बताए । उनले मार्गदर्शनमा देखिएका समस्या समाधान गर्न राष्ट्र बैंक तयार रहेको सन्देश मौद्रिक नीतिको समीक्षाले दिएको बताए । उनले वाणिज्य बैंक तथा अन्य वित्तीय संस्थाहरूलाई अहिलेको परिस्थितिमा परेको समस्यालाई मौद्रिक नीतिको समीक्षाले सम्बोधन गर्ने विषय उल्लेख भएको पनि बताए ।