बैतडी पञ्चेश्वर गाउँपालिका–४ की २१ वर्षीया माया लुहारको म्यादी प्रहरीको जागिर सकिएको ६ दिनमा हत्या भयो । जिल्ला प्रहरी कार्यालय बैतडीका प्रवक्ता प्रहरी निरीक्षक (इन्स्पेक्टर) प्रेम शाहीले उनी भर्खरै म्यादी प्रहरी सकाएर आएको बताए । 

‘उनी प्रतिनिधि सभा निर्वाचनमा म्यादी प्रहरी भएको खुलेको छ । तर, उनको हत्या कसले किन ग¥यो भन्ने खुलेको छैन । हामीले अनुसन्धान गरिरहेका छौँ’, इन्स्पेक्टर शाहीले लोकान्तरसँग भने । 

उनकी भदैनी १५ वर्षीया नेहा पनि घाँटी रेटिएको अवस्थामा फेला परेकी थिइन् । गम्भीर घाइते नेहाको अहिले डडेल्धुरामा उपचार भइरहेको प्रवक्ता शाहीले बताए । 

अनुसन्धानमा खटिएका प्रहरी अधिकारीहरूका अनुसार घाइते नेहाले अचेत अवस्थामा ‘टाइगर’ भन्ने बोलिरहेकी छन् । नेहाले आफूलाई मोबाइल दिएर टाइगरले मायालाई जंगलमा लगेको र पछि आएर आफूलाई पनि आक्रमण गरेको प्रहरीलाई अचेत अवस्थामै बताएको ती अधिकारीले लोकान्तरसँग भने । 

कसरी भयो हत्या 

बैतडीको पञ्चेश्वर गाउँपालिका–४ सैलोडाकी २१ वर्षीया माया लुहार र १५ वर्षीया नेहा लुहार गाउँकै अन्य दुईजना साथीसँग मंगलवार बिहान घरबाट लुगा सिलाउन पञ्चेश्वर गाउँपालिका–३ कुलाउतर्फ निस्केका थिए ।

करिब डेढ घण्टाको दूरीमा रहेको लुगा सिलाउने ठाउँबाट उनीहरूसँगै गएका अन्य २ जना साथीहरू फर्किए । तर, नेहा र माया भने फर्किएनन् । कुलाउमा इष्टमित्र बस्ने भएकाले उनीहरू त्यहीँ बसेको परिवारका सदस्यहरूले अनुमान गरे । तर, उनीहरू दोस्रो दिन बिहानसम्म पनि सम्पर्कमा नआएपछि परिवारले खोजी गरे । आफन्तसँग खोजी गर्दा पनि उनीहरू फेला परेनन् । 

त्यसपछि परिवारका सदस्य र गाउँलेहरूले अन्य संभावित ठाउँमा माया र नेहाको खोजी गरे । नेहालाई बुधवार दिउँसो गोठालोहरूले पञ्चेश्वर गाउँपालिका र शिवनाथ गाउँपालिकाको सिमानास्थित बालाडाँगामा फेला पारे । त्यसपछि उनीहरूले प्रहरीलाई खबर गरेका थिए ।  

मायाको शव शिवनाथ गाउँपालिका–६ शिवनाथ मन्दिर नजिकै भेटिएको प्रवक्ता प्रेम शाहीले लोकान्तरलाई बताए । शाहीका अनुसार मायाको घाँटी रेटेर हत्या गरिएको अवस्थामा शव भेटिएको थियो । 

माया जवलपुर माध्यमिक विद्यालय सैलोडामा कक्षा १२ र नेहा कक्षा ९ मा अध्ययनरत थिइन् ।

घाइते नेहाको अहिले उपचार भइरहेको छ । स्थानीयले घटनामा शिवनाथ गाउँपालिका–६ सोलपालाका एक सशस्त्र प्रहरीको संलग्नता रहेको आशंका गरेका छन् । ती सशस्त्र प्रहरी जवान बिदामा घर आएका थिए । केही दिनअघि कुलाउमा उनले मायाको मोबाइल खोसेको प्रहरीको अनुसन्धानमा देखिएको छ । त्यसबेला घरमा सोधी–खोजी गर्दा मायाले मोबाइल ‘साथी’ले लगेको बताएकी थिइन् । ती सशस्त्र प्रहरी जवान अहिले फरार छन् । फरार रहेकाले पनि उनीप्रति शंका बढेको स्थानीयले बताएका छन् ।