महाभियोग लागेका प्रधानन्यायाधीश चोलेन्द्रशमशेर जबरालाई चोख्याउने अनधिकृत पत्र लेखेर संसद्का महासचिवले राजद्रोहात्मक काम गरेको दाबी अदालतमा गरेका छन् । सार्वभौम संसद्को अधिकारको दुरुपयोग गरेर मानहानीको काम गरेको थापाले जिकिर गरे । 

संवैधानिक इजलासमा चोलेन्द्रको निलम्बन फुकुवाविरुद्ध परेको रिटमाथि शुक्रवार भएको सुनुवाइका क्रममा थापाले निवेदन दिएर महाभियोगको सफाइ नपाइने बताएका हुन् । ‘संसद्का महासचिवले गरेको काम राजद्रोहात्क कार्य हो, चोलेन्द्रलाई निवेदन दिने अधिकार कसले दियो ? मैले सफाइ पाउँ भनेर निवेदन दिएर सफाइ पाइन्छ ?’, थापाले भने, ‘निलम्बित प्रधानन्यायाधीश र संसद्का महासचिवले संवैधानिक व्यवस्था तहस–नहस पार्ने काम गरेका छन्, संसदको मानहानी मात्र होइन, राजद्रोहत्मक काम गरेका छन् ।’

चोलेन्द्रमाथि लागेको आरोपको फैसला संसद्ले मात्र गर्न सक्ने उनले बताए । ‘तोक आदेशको पत्रले होइन, कानूनको जंजिरले मुक्त हुने हो, महाभियोग लागेको हो, मुद्दा हो । त्यसको फैसला संसदले गर्ने हो’, थापाले भने । 

कामु प्रधानन्यायाधीश हरिकृष्ण कार्की नेतृत्वको संवैधानिक इजलासमा शुक्रवार दिउँसो सवा १ बजे सुनुवाई सम्पन्न भएको छ ।