राष्ट्रपति विद्यादेवी भण्डारीले उद्योगलाई आवश्यक पर्ने कच्चा पदार्थ देशभित्र नै उत्पादन गर्नुपर्ने बताएकी छन् ।

विराटनगरमा विराट एक्सपोको उद्घाटन गर्दै राष्ट्रपति भण्डारीले देशभित्र सञ्चालित उद्योगका लागि आवश्यक कच्चा पदार्थ देशभित्र नै उत्पादन गर्न सबैले ध्यान दिनुपर्ने बताइन् ।

औद्योगिक पहिचान बनाएको विराटनगरको शाख गुम्न दिन नहुने समेत उनले बताएकी छन् । 

सातौं संस्करणको विराट एक्स्पो बिहीवारदेखि विराटनगरमा शुरू भएको छ । मंसिर २९ देखि पुस ६ गतेसम्म विराटनगर महानगरपालिका–१४ स्थित डिग्री क्याम्पस (पुरानो हवाइ फिल्ड) मा एक्स्पो शुरू भएको छ ।

उद्योग संगठन मोरङको आयोजनामा हप्तादिनसम्म सञ्चालन हुने एक्स्पोमा ३६१ स्टल रहेका छन् ।
 
एक्स्पो अवधिभर माउन्टेन फ्लाइटको व्यवस्था पनि गरिएको छ । माउन्टेन फ्लाइटबाट हिमाल दर्शन गरेको ११ हजार ९९९ रुपैयाँ रहेको छ । फ्लाइटबाट ताप्लेजुङको पाथिभरा दर्शन गराइने भएको छ । एक्स्पो अवधिभर ३ वटा फ्लाइट गर्ने तयारी गरिएको उद्योग संगठन मोरङका अध्यक्ष सुयश प्याकुरेलले जानकारी दिए ।

‘माउन्टेन फ्लाइटको बुकिङ पनि भइसकेको छ,’ उनले भने, ‘विराटनगरबाट दीर्घकालीन रूपमा माउन्टेन फ्लाइटको व्यवस्था गर्नका लागि पनि हामीले एक्स्पोमा माउन्टेन फ्लाइट राखिएको हो ।’

एक्स्पोको मुख्य आकर्षण आर्थिक एवं कृषि तथा औद्योगिक क्षेत्रका विषयगत मुद्दाहरूमा नीतिगत छलफल, अनुभव आदानप्रदान, नवीतम सोच भएका युवा उद्यमीको स्टार्टअप कर्नरका लागि छुट्टै पेभिलियन, प्रदेश आर्थिक वृद्धि तथा लगानी सवलीकरणका लागि एसियन फाउन्डेसन र प्रदेश नागरिक विकास बोर्डसँग सहकार्यमा लगानी सम्मेलन, १ नम्बर प्रदेशमा लगानीका सम्भावना भएका कुराको प्रदर्शनीको छुट्टै पेभिलियन राखिएको एक्स्पोका संयोजक भोलेश्वर दुलालले जानकारी दिए । पहिलोपटक एक्स्पोमा रोबटसँग प्रत्यक्ष संवाद गर्ने मौका मिल्नेछ ।

थ्रीडी भर्चुयल टूरमार्फत प्रदेशको प्रख्यात पर्यटकीय क्षेत्र सगरमाथाको बेस क्याप, गुफा पोखरी, पाथीभरा मन्दिरलगायत हेर्न सकिने जनाइएको छ ।