नेकपा एमालेका अध्यक्ष केपी शर्मा ओलीले निर्वाचनमा कम सीट जितेको भए पनि एमालेले अहिले उत्सव मनाइरहेको बताएका छन् । एमालेका नवनिर्वाचित सांसदहरूलाई बधाई दिन मंगलवार प्रज्ञा भवनमा आयोजित समारोहलाई सम्बोधन गर्दै ओलीले चुनावमा एमालेले ठूलो घेराबन्दी तोडेको बताए । 

‘शान्तिपूर्ण महासंग्राम भएको छ । त्यसको परिणाम लिएर उल्लासपूर्ण वातावरणमा उपस्थित भएका छौँ । मनोबल उच्च भएको छ । आत्मविश्वास बढेको छ । अहिलेको सीट संख्याले होइन । सीट संख्याभन्दा पनि जस्तो खालको घेराबन्दी, षड्यन्त्र, अफवाह, धाँधली र बुथ क्याप्चरको बीचमा एमाले सर्वाधिक लोकप्रिय पार्टीकोरूपमा उदाएको छ’, ओलीले भने । 

निर्वाचनका बेलामा देखिएको हर्कत हेर्दा एमालेले ठूलो जित निकालेको निष्कर्षमा पार्टी रहेको उनले बताए । ‘अपेक्षा गरेको सीट ल्याउन सकेनौँ । तर, उत्सव मनाइरहेका छौँ । उल्लासमय वातावरणमा छौँ’, ओलीले भने । 

निर्वाचनका बेला प्रतिस्पर्धीहरूले ‘धुलो चटाउँछौँ, भित्तामा टाँस्छौँ, दिउँसै टर्च बालेर खोज्नुपर्ने हुन्छ’ भनेको स्मरण गर्दै एमालेले त्यसलाई पराजित गरेको ओलीले बताए ।

‘उनीहरूले धुलो चटाउँछौँ, भित्तामा टाँस्छौँ, दिउँसै टर्च बालेर खोज्नुपर्ने हुन्छ भनेको मात्रै होइन । उनीहरू यस्तो निष्कर्ष निकाल्न चाहन्थे’, ओलीले भने । 

‘समृद्ध नेपाल, सुखी नेपालीको राष्ट्रिय आकांक्षा बनाएर, त्यसको गन्तव्यमा पुर्‍याउने आवाज ध्वनी मात्रै होइन, देशको आवश्यकता र समयको माग हो’, ओलीले भने ।