सरकार गठनको लागि सहमति जुटाउन गठबन्धनमा रहेका दलका नेताहरूको दौडधुप जारी छ । 

गठबन्धनका दलहरुका बीच ‘पावर शेयरिङ’को विषय मिल्न नसक्दा सरकारको नेतृत्व कसले गर्ने भन्ने पनि टुुंगो लाग्न सकेको छैन । 

माओवादी केन्द्रका अध्यक्ष पुष्पकमल दाहाल प्रचण्डले पहिलो पालोमा सरकारको नेतृत्व पाउनुपर्ने दाबी गरेका छन् । तर, कांग्रेसले पनि राष्ट्रपति र प्रधानमन्त्री आफैले पाउनुपर्ने दाबी नछाडेपछि सरकारको नेतृत्व कसले गर्ने भन्ने विषय टुंगोमा पुग्न नसकेको हो ।

शनिबार दिउँसो कांग्रेसका नेता रामचन्द्र पौडेलले माओवादी केन्द्रका अध्यक्ष पुष्पकमल दाहाल प्रचण्डलाई भेटेर दोस्रो पालोमा प्रधानमन्त्री बन्न आग्रह गरेका थिए । तर, प्रचण्डले पहिलो पालोमा प्रधानमन्त्री बन्ने अडान छाडेका छैनन् । 

नेपाली कांग्रेसका उपसभापति पूर्णबहादुर खड्काले पनि शनिबार दिउँसो नै माओवादी केन्द्रका अध्यक्ष पुष्पकमल दाहाल प्रचण्ड र एकीकृत समाजवादीका अध्यक्ष माधव नेपालसँग छुट्टाछुट्टै भेटवार्ता गरेका छन् । 

भेटवार्तापछि उनले गठबन्धनले नै सरकार बनाउने र नेतृत्वको विषयमा दिउँसो ४ बजे बैठक बसेर सहमति बनाउने बताए । 

खड्काले लोकान्तरसँग भने, ‘गठबन्धनकै सरकार बनाउने विषयमा सबै एकमत छौं । सरकार बनाउने बारे निरन्तर छलफल गरिरहेका छौं ।’

तर, उनले माधव नेपाल र प्रचण्डलाई भेटेर भनेको विषय भने खुलाउन चाहेनन् । उनले भने, ‘सरकारको नेतृत्व कसले गर्ने भन्ने बारेमा छलफल चलिरहेको छ । समझदारी बन्छ । यही गठबन्धन निरन्तर जान्छ । अरु दलहरुलाई पनि गठबन्धनमा जोड्छौं ।’

सरकारको नेतृत्वबारे छलफल गर्न दिउँसो ४ बजे गठबन्धनको बैठक बालुवाटारमा बस्न लागेको उनले बताए । 

राष्ट्रपति विद्यादेवी भण्डारीले बहुमतको सरकार गठनको लागि संविधानको धारा ७६ (२) अनुसार प्रधानमन्त्रीको नाम सिफारिस गर्न आइतबार साँझसम्मको समय दिएकी छन् ।