नेकपा एकीकृत समाजवादी (एस) पार्टीले सरकारमा सहभागिताको विषयमा जिल्ला अध्यक्षसम्मका नेताहरूको सुझाव लिन भर्चुअल बैठक गरिरहेको छ । 

बैठकमा केन्द्रीय कमिटीका सदस्यदेखि जिल्ला अध्यक्षसम्मका नेताहरू सहभागी भएको एकीकृत समाजवादीका प्रवक्ता जगन्नाथ खतिवडाले जानकारी दिए । 

प्रधानमन्त्री पुष्पकमल दाहाल ‘प्रचण्ड’ले एकीकृत समाजवादीलाई सरकारमा सहभागी हुन आग्रह गरिरहेका छन् । 

प्रधानमन्त्री प्रचण्ड र माधवकुमार नेपालले बुधवार बिहान पनि भेटेर छलफल गरेका थिए । उनीहरूले हात्तिवनस्थित प्रचण्डका भान्जाको घरमा भेटवार्ता गरेका थिए । 

त्यसलगत्तै उपप्रधान एवं भौतिक योजना तथा यातायात व्यवस्थामन्त्री नारायणकाजी श्रेष्ठले पनि नेपालको घरमै गएर भेटवार्ता गरेका थिए । 

सरकारमा सहभागी हुने वा नहुने विषयमा बैठक बसेर मात्रै निर्णय लिन केन्द्रीय सदस्य र जिल्ला अध्यक्षहरूले माधवकुमार नेपाललाई दबाब दिएपछि बुधवार भर्चुअल बैठक आयोजना गरिएको एकीकृत समाजवादीका एक केन्द्रीय सदस्यले जानकारी दिए । 

दिउँसो २ बजेबाट शुरू भएको बैठकमा पार्टीका पदाधिकारीहरू पार्टी कार्यालयबाट र अन्य नेताहरू आफू रहेको ठाउँबाट भर्चुअल बैठकमा सहभागी भएका छन् ।