नेपाली कांग्रेसका सभापति तथा प्रतिनिधिसभा सदस्य डा. शेखर कोइरालाले कांग्रेसले नेकपा माओवादी केन्द्र र नेकपा एमालेको चाल बुझ्न नसक्दा दुर्घटना भएको बताएका छन् ।

नेता कोइरालाले तत्कालै कांग्रेसको नीति अधिवेशन गर्न समेत माग गरेका छन् ।

विराटनगर विमानस्थलमा बुधवार साँझ सञ्चारकर्मीसँग कुरा गर्दै नेता कोइरालाले कांग्रेसले नीति अधिवेशन गरेर अगाडि बढ्नु अबको आवश्यकता भएको बताए । कांग्रेस नेताहरूले विशेष अधिवेशनको माग गरिरहेको बेला कोइरालाले विशेष अधिवेशन बोलाउने प्रक्रिया लामो र झन्झटिलो भएको भन्दै नीति अधिवेशन बोलाउनुपर्ने बताए ।

उनले पार्टी सभापति शेरबहादुर देउवाको विषयमा केन्द्रीय समितिको बैठकले निर्णय गर्ने बताए । ‘कसैले सामाजिक सञ्जालमा राजीनामा दिनुपर्छ, कारबाही गर्नुपर्छ भनेर कुरा उठाउँदैमा त्यस्तै हुन्छ भन्ने छैन,’ उनले भने, ‘मलाई पनि मुखमा आएको सत्ता गयो भन्ने चिन्ता छ तर कारबाही भन्ने कुरा एक्लै नै बोलेर हुँदैन, केन्द्रले गर्ने निर्णय हो ।’ 

उनले माओवादी र एमालेको चाललाई कांग्रेसले बुझ्न नसकेको बताए । ‘सभापतिजीले उनीहरूको चाल बुझ्नुभएन तर हामी समीक्षा गरेर अगाडि बढ्छौं,’ उनले भने । चुनावअघि गठबन्धन गर्दा पाटीलाई क्षति पुगेको समेत उनले बताए ।
 
‘मैले पहिलादेखि नै चुनावपछि मात्रै गठबन्धन गरौं भनेको हो,’ नेता कोइरालाले भने । निर्वाचनमा जाँदा नै गठबन्धन गर्दा कमजोरी भएको पनि उनले बताए । ‘कांग्रेस ठूलो पार्टी भएकाले प्रधानमन्त्री पाउनुपर्छ भन्नु हाम्रो स्वाभाविक दाबी थियो । प्रचण्डजीले त्यो रुचाउनुभएन । दुवैतर्फबाट पदको आशक्ति भएका कारण गठबन्धन टुट्यो,’ उनले भने । 

प्रचण्डले तत्कालीन सत्ता गठबन्धनको मर्म नबुझेको समेत कोइरालाले आरोप लगाए । कांग्रेस छाडेर एमालेसँग मिल्नु भनेको माओवादी अध्यक्ष प्रचण्डले गठबन्धनको मर्म बुझ्न नसकेको उनको भनाइ छ । कांग्रेसभित्र पनि समस्या रहेको उनले बताए ।

‘प्रधानमन्त्री वा राष्ट्रपति के लिने भनेर सभापति लगायत वार्तामा हुनेहरूले फाइनल गर्नुपथ्र्याे, उहाँहरू चुक्नुभएको छ,’ कोइरालाले भने, ‘राष्ट्रपति लिएर सहमति गरेको भए पनि हुन्थ्यो जस्तो मलाई लाग्छ । सभापति देउवाजीले अन्तिम समयमा पार्टीका पदाधिकारीलाई राखेर अगाडि बढ्नुपर्थ्यो तर त्यो सम्भव नभए महामन्त्री राखेर यस्तो अवस्था आयो भनेर छलफल गरेको भए पहिलाकै सत्ता गठबन्धन कायम रहन सक्थ्यो, यो कमजोरी भयो ।’

उनले पुस २२ गते बस्ने केन्द्रीय कमिटीको बैठकले चुनावी समीक्षा गरेर अगाडि बढ्ने समेत बताए ।