इरानमा महिलाहरूले लगाउने हिजाबको विरोधमा भइरहेको प्रदर्शन अब इस्लामिक शासनविरुद्धको प्रदर्शनमा परिणत भएको छ । 

सरकारले प्रदर्शनकारीहरूको दमन गरिरहेको भन्दै मानिसहरूले हिंस्रक प्रदर्शन गर्न थालेका छन् । सर्वोच्च नेता आयातोल्लाह खमेनीविरुद्ध पनि उनीहरूले नारा लगाउन थालेका छन् । 

जाहेदान नामक स्थानमा तानाशाह मूर्दाबाद, खोमेनी मूर्दाबाद भन्दै नारा लागेको हो । 

सुरक्षाकर्मीबाट मारिएका मानिसको सम्झना गर्दै शुक्रवार कब्रिस्तानहरूमा पनि भीड जम्मा भएको छ । 

हिजाबको अनिवार्यतालाई अन्त्य गर्ने मात्र नभई इस्लामिक शासनलाई नै अन्त्य गर्ने गरी प्रदर्शन चर्किन थालेको छ । महिलाहरूले पूर्ण लोकतान्त्रिक अधिकारहरूको माग गरिरहेका छन् र अधिकार नपाउन्जेल सडकमा विरोध जारी राख्ने बताएका छन् । 

यसैबीच इरानमा २२ वर्षका मोहम्मद गोबाद्लूलाई त्यहाँको अदालतले मृत्युदण्डको सजाय दिएको छ । सरकारविरुद्ध प्रदर्शन गरेकोमा उनलाई उक्त सजाय दिइएको हो । 

मानवअधिकारकर्मीहरूका अनुसार, अहिलेसम्म १०० भन्दा बढी प्रदर्शनकारीलाई मृत्युदण्ड दिइसकिएको छ ।