नेपाली राष्ट्रिय क्रिकेट टिमका पूर्वकप्तान सन्दीप लामिछाने धरौटीमा रिहा भएपछि उनका वकिल सरोजकृष्ण घिमिरेले सञ्चारकर्मीहरूसँग कुरा गर्दै सन्दीपको अनुपस्थितिमा नेपालको क्रिकेट धराशयी भएको बताएका छन्। 

उनले यस्तो अवस्थालाई मध्यनजर गरी क्यानले पुनः सन्दीपलाई कप्तानी दिनेमा आफू विश्वस्त रहेको पनि बताए। उनले सन्दीप शारीरिक रुपमा ठीक रहेको मानसिक रूपमा काउन्सिलिङमा रहने पनि स्पष्ट पारे। 

उच्च अदालत पाटनले दिएको आदेशपछि २० लाख रुपैयाँ धरौटी बुझाएर सन्दीप आज (शुक्रबार) काठमाडौं जिल्ला अदालतबाट रिहा भएका हुन् । उच्च अदालत पाटनले दिएको आदेश पालना गर्ने प्रतिबद्धतासहित उनलाई शुक्रबार दिउँसो थुनामुक्त गरिएको हो ।

उनले अबको कानुनी प्रक्रिया बाहिरबाटै लड्नेछन् । सन्दीपलाई धरौटीमा छोड्ने आदेश गर्दा अदालतले उनलाई विदेश जान रोक लगाएको छ भने पीडित र मुद्दाबारे कुनै सामग्री प्रकाशन गर्न वा विद्युतीय, सार्वजनिक सञ्चारमाध्यम, सामाजिक सञ्जालमा कुनै टीकाटिप्पणी गर्न पनि निषेध गरेको छ ।
उनले भने, ‘सन्दीप २० लाख धरौटीमा अदालतको शर्त मान्ने शर्तमा रिहा भएका छन् । बाहिरबाट उनले अब बाँकी मुद्दा लड्नेछन् । क्यानको मिटिङ बस्दैछ । दोषी प्रमाणित नहुन्जेलसम्म निर्दोष नै रहन्छन् । सन्दीपको अनुपस्थितिमा नेपालको क्रिकेट धराशायी भएको देखिएको छ । मलाई लाग्छ, क्यानले फेरि
सन्दीपलाई क्याप्टेन बनाउनेछ ।’

बिहीबार न्यायाधीश ध्रुवराज नन्द र रमेश ढकालको इजलासले सन्दीपलाई पुर्पक्षका लागि थुनामा पठाउने जिल्ला अदालत, काठमाडौंको आदेश बदर गर्दै धरौटीमा छोड्न आदेश दिएको थियो ।