प्रधानमन्त्रीमा पुष्पकमल दाहाल प्रचण्डले विश्वासको मत लिएपछि मन्त्रिपरिषद् विस्तारमा सत्तारूढ दलहरू जोडतोडका साथ लागिपरेका छन्।

यसकै लागि पृथ्वीजयन्तीका दिन प्रचण्ड आफू निर्वाचित जिल्ला गोरखाबाट फर्किएलगत्तै नेकपा एमाले अध्यक्ष केपी ओलीलाई भेट्न उनकै निवास बालकोट पुगेका थिए।

त्यस्तै मुख्य मुद्दा सरकार विस्तारकै लागि एमाले अध्यक्ष ओली प्रचण्डलाई भेट्न बालुवाटार पुगेका थिए।

एमालेबाट विष्णु पौडेल उपप्रधानमन्त्री एवं अर्थमन्त्री भइसकेका छन् । ज्वालाकुमारी साह, दामोदर भण्डारी, राजेन्द्र राई मन्त्री चयन भइसकेका छन् ।

तर यिनीहरूलाई जिम्मेवारी तोकिएको छैन । ११ पुसमा यी ३ मन्त्रीले शपथ लिएका थिए । तर अहिलेसम्म मन्त्रालयको जिम्मेवारी भने पाएका छैनन् । यी तीन जनासँगै जनमत पार्टीका उपाध्यक्ष अब्दुल खानले पनि मन्त्रीमा शपथ लिए पनि जिम्मेवारी पाएका छैनन् ।

एमालेले यसपटक अहिलेसम्म मन्त्री नभएका र दुईपटक जितेर पनि अवसर नपाएकालाई मन्त्री बनाउने तयारी गरेको अध्यक्ष ओलीनिकट स्रोत बताउँछ ।

लगातार दुईपटक चुनाव जितेर मन्त्री नबनेकामा कास्कीकी विद्या भट्टराई र पर्वतका पदम गिरी छन् ।

यी दुवैको भूगोल एउटै प्रदेश परेकोले दुईमध्ये एक जनाको मात्रै मन्त्री बन्ने सम्भावना रहेको बताइन्छ ।

रवीन्द्र अधिकारीको मृत्युपछि विद्याले उपचुनाव जितेकी थिइन् । यसपटक पनि चुनाव जितेपछि उनी मन्त्रीका लागि बलियो दाबेदार हुन् । तर विद्याले मन्त्रीका लगि यसपटक सुनसरीमा विजय गच्छदारलाई पराजित गरेकी भगवती चौधरीसँग पनि प्रतिस्पर्धा गर्नुपर्ने बताइन्छ । यी दुईमध्ये एकलाई एमालेले मन्त्रीमा अघि सार्ने बुझिएको छ ।

टोपबहादुर र लुम्बिनीबाट सूर्य दाबेदार

लुम्बिनी प्रदेशबाट टोपबहादुर रायमाझी पहिलोपटक चुनाव जितेका सूर्य थापा मन्त्रीका लागि दाबेदार देखिएका छन् ।

अर्घाखाँचीबाट चुनाव जितेका टोपबहादुर र प्युठानबाट प्रतिनिधिसभाको चुनाव जितेका दुवै प्रचण्डका आलोचक हुन् । यसैले यी दुवैलाई प्रचण्डले एमालेले मन्त्रीका लागि सिफारिस नगरोस् भन्ने चाहना राखेको एमाले स्रोत बताउँछ ।

‘रायमाझी प्रचण्डका आलोचनक हुन् । थापाले पनि प्रचण्डलाई नै गाली गरेर राजनीतिक उचाइ प्राप्त गरे भन्ने छ’, एमाले स्रोत भन्छ, ‘यसैले यी दुवैलाई एमालेले मन्त्रीका रुपमा नपठाए हुन्थ्यो भन्ने प्रचण्डको अपेक्षा भएको बुझेका छौं ।’

तर एमालेले निर्णय गरेर पठाउँदा प्रचण्ड रोक्न सक्ने अवस्थामा छैनन् । रायमाझीले पटकपटक अवसर पाएका छन् । तर पहिलोपटक चुनाव जितेका थापा यसपटक मन्त्रीका लागि सबैभन्दा बढी इच्छुक छन् । अध्यक्ष केपी ओली र उनका विश्वासपात्र नेता विष्णु रिमालसँग थापाको राम्रो सम्बन्ध रहेको बताइन्छ । यसैले यसपटक थापाको पनि मन्त्री बन्ने सम्भावना उत्तिकै छ।

बाग्मतीमा एमाले सांसदमा जित्नेमा काभ्रेबाट गोकुल बाँस्कोटा, काठमाडौंबाट कृष्णगोपाल श्रेष्ठ, मकवानपुरबाट महेश बर्तौला र ललितपुरबाट प्रेम महर्जन छन् ।

यी चारमध्ये एक जना मन्त्री बन्ने बताइन्छ । कृष्णगोपाल पटकपटक मन्त्री भइसकेकोले फेरि पनि गोकुलको मन्त्रीमा सम्भावना बढी रहेको एमाले स्रोत बताउँछ । गोकुल मन्त्री नबन्दा मकवानपुरबाट चुनाव जित्ने बर्तौला पनि अर्का बलिया दाबेदार हुन् ।

यसपटक मन्त्रीका लागि योगेश भट्टराईले खासै रुचि देखाएका छैनन्।

तर पहिलोपटक चुनाव जितेका ठाकुर गैरे भने यसपटक मन्त्रीका लागि दाबेदार हुन् । पृथ्वीसुब्बा गुरुङ गण्डकी प्रदेशको मुख्यमन्त्री भइसकेका नेता हुन् । अन्य दुई प्रभावशाली नेता छविलाल विश्वकर्मा र गोकर्ण विष्ट छन् । विष्ट मन्त्रीका लागि दाबेदार हुन्, तर अध्यक्ष ओलीले उनलाई यसपटक अवसर दिने सम्भावना कम रहेको बताइन्छ ।

रघुवीर महासेठले सके आफू सभामुख हुने नभए श्रीमती जुलीकुमारी महतोलाई मन्त्री बनाउन खोजेका छन् । सिरहाबाट चुनाव जितेका लीलानाथ श्रेष्ठ पनि यसपटक मन्त्रीका लागि दाबेदार रहेको बताइन्छ । समानुपातिक सांसद रघुजी पन्त र एकनाथ ढकाल पनि मन्त्रीका लागि दाबेदार हुन्।

अध्यक्ष ओलीले महासचिव शंकर पोखरेल, उमहासचिव विष्णु रिमालसँग छलफल गरेर मन्त्रीको नाम टुंगो लगाउने तयारी गरेका छन् । मन्त्रिपरिषद् विस्तारकै लागि प्रधानमन्त्री पुष्पकमल दाहाल प्रचण्ड र एमाले अध्यक्ष केपी ओलीबीच शनिबार बिहान बालुवाटारमा छलफल भएको थियो ।

ओलीनिकट स्रोतका अनुसार आइतबारसम्म सबै मन्त्रीको टुंगो लागेपछि मन्त्रिपरिषद् विस्तार हुनेछ ।