पार्टी गठनको छोटो समयमै २० सिट जितेर राजनीतिक तहल्का मच्याएको रवि लामिछाने नेतृत्वको राष्ट्रिय स्वतन्त्र पार्टीेले पहिलोपटक नै राज्यसत्तामा अस्वाभाविक प्रवेश पाएको छ । 

टेलिभिजन प्रस्तोताको जिम्मेवारी छाडेर पार्टी खोलेका रवि आफैं प्रचण्ड नेतृत्वको सरकारमा उपप्रधानमन्त्री एवं गृहमन्त्री छन् ।

शिशिर खनालले शिक्षा मन्त्रालयको जिम्मेवारी पाउँदा श्रम, रोजगार तथा सामाजिक सुरक्षा मन्त्रालयको जिम्मेवारी डोलप्रसाद अर्यालले पाएका छन् । ललितपुर–३ बाट चुनाव जितेकी डा. तोसिमा कार्की स्वास्थ्य राज्यमन्त्री बनेकी छन् ।

यसैमध्येका खनालले गत मंसिर ४ गतेको चुनाव काठमाडौं–६ बाट जितेका थिए । खनालले नेपाल प्रहरीका पूर्व आईजीपी सर्वेन्द्र खनाललाई ५ हजार ३०४ मतान्तरले पराजित गरेका थिए ।  खनालले १४ हजार २२१ मत ल्याउँदा पराजित सर्वेन्द्रले ८ हजार ९१७ मत ल्याएका थिए । अर्का उम्मेदवार कांग्रेसका भीमसेनदास प्रधानले ८ हजार ८१२ मत प्राप्त गरेका थिए ।

गोंगबु घर भएका उनै ४३ वर्षीय खनालले पहिलोपटक सांसद हुँदा नै शिक्षा जस्तो महत्त्वपूर्ण मन्त्रालय पाएका छन् । 

अमेरिकाको युनिभर्सिटी अफ विस्कन्सनबाट खनालले सार्वजनिक नीतिमा स्नातकोत्तर गरेका छन् । उनी १२ वर्षअघि स्थापना भएको टिच फर नेपालका सहसंस्थापक हुन् । 

मंसिर ४ गतेको चुनाव घोषणा भएलगत्तै उनले काठमाडौं–६ बाट स्वतन्त्र रूपमा उम्मेदवारी घोषणा गरेका थिए । तर पछि उनी रविको स्वतन्त्र पार्टीबाट उम्मेदवार बनेर जित्न पुगे । 

सर्वोदय यूएसएको कार्यकारी निर्देशक भएर पनि खनालले काम गरेका थिए । उनी उद्यमी पनि हुन् । उनी ‘पिक एन्ड ड्रप’ लजिस्टिक कम्पनीका सहसंस्थापक पनि हुन् । 

उनले २०७४ सालको स्थानीय तह चुनावपछि दाङको तुलसीपुर उपमहानगरको शिक्षा सल्लाहकार भएर पनि काम गरेका थिए ।