कर्णाली प्रदेशसभा उपसभामुखमा नेकपा माओवादी केन्द्रकी यशोदा न्यौपाने निर्वाचित भएकी छन् ।

प्रदेश सभाको बुधवार बसेको बैठकले मत विभाजनका आधारमा प्रदेशसभा सदस्य न्यौपानेलाई उपसभामुख पदमा निर्वाचित गरेको हो ।

सत्तारुढ दलका साझा उम्मेदवार न्यौपानेसँग नेपाली कांग्रेसकी इन्द्राकुमारी शाहीले प्रतिस्पर्धा गरेकी थिइन् । न्यौपानेको पक्षमा २४ र शाहीको पक्षमा १४ मत खसेको थियो ।

न्यौपानेलाई उपसभामुख पदमा निर्वाचित गरियोस् भन्ने माओवादी केन्द्रका कृष्ण जिसीको प्रस्तावमा एमालेका विनोदकुमार शाहले समर्थन गरेका थिए । प्रस्तावमा एमाले, माओवादी केन्द्र, राप्रपा र नेकपा एकीकृत समाजवादीले मतदान गरेका थिए । शाहीको प्रस्तावक कांगे्रसका जीवनबहादुर शाही र समर्थक जानकी सिंह थिए ।

उनले कांग्रेसका १४ सांसदको मात्र मत पाइन् । स्वतन्त्र सांसद देवेन्द्रबहादुर शाही तटस्थ बसेका थिए । दुवै प्रस्ताव निर्णयार्थ प्रस्तुतपश्चात सभामुख नन्दा गुरुङले उपसभामुखमा न्यौपाने विजयी भएको घोषणा गरेकी थिइन् ।

कालीकोट निवासी ४० वर्षीया न्यौपाने माओवादी केन्द्रकी केन्द्रीय सदस्य हुन् । उनी २०५७ सालदेखि माओवादीको भूमिगत राजनीतिमा आवद्ध भएकी थिइन् । उनी २०५९ सालमा जनमुक्ति सेनाको प्लाटुन कमाण्डर, कम्पनी कमिसार हुँदै बटालियन कमिसार समेत भएकी थिइन् । सेना समायोजनपछि पार्टी राजनीति रोजेकी थिइन् ।