नवनियुक्त उपप्रधानमन्त्री एवम् ऊर्जा, जलस्रोत तथा सिँचाइमन्त्री राजेन्द्र लिङ्देनसँग गैर आवासीय नेपाली संघ (एनआरएनए)का पदाधिकारीहरूले भेट गरेका छन् ।

बुधबार दिउँसो सिंहदरबारस्थित उनकै कार्यकक्षमा पुगेर एनआरएनएका अध्यक्ष रविना थापा, संस्थापक अध्यक्ष उपेन्द्र महतोलगायत पदाधिकारीहरुले भेट गरेका हुन्। भेटका क्रममा आफूहरूको मुद्दाबारे ज्ञापनपत्रमार्फत उपप्रधानमन्त्री लिङ्देनलाई पनि जानकारी गराइएको अध्यक्ष थापाले बताए। 

गैरआवासीय नेपाली संघले नेपालमा लगानी भित्र्याउन आफूहरू तयार रहे पनि त्यसको सुरक्षा प्रत्याभूति हुन नसकेको गुनासो सरकारसँग गर्दै आएको छ । आफूहरूको सरोकारबारे सम्बन्धित मन्त्रालयको ध्यानाकर्षण गराउन नवनियुक्त मन्त्रीहरूसँगको भेटवार्ता पनि शुरु गरिएको एनआरएनएले जनाएको छ ।