नेसनल लाइफ इन्स्योरेन्स कम्पनी लिमिटेडले माघ ६–८ गतेसम्म मधेश प्रदेशको वीरगञ्जस्थित होटल क्लार्क रिसोर्टमा कम्पनीका प्रमुख कार्यकारी अधिकृतको सभापतित्वमा एमडीआरटी सम्मान तथा तालिम कार्यक्रम सम्पन्न गरेको छ ।

तोकिएको बीमा शुल्क संकलन गरी नेपालभरबाट योग्य भएका १२६ जना अभिकर्ताको सहभागितामा कम्पनीले तालिम तथा सम्मान कार्यक्रम सम्पन्न गरेको हो । 

प्रमुख कार्यकारी अधिकृत सुरेशप्रसाद खत्रीले पानसमा द्विप प्रज्वलन गर्दै शुभारम्भ गरिएको सम्मान कार्यक्रममा सहभागी भएका अभिकर्ताहरूलाई अन्तर्राष्ट्रिय प्रशिक्षक तरुण ओझाले उनीहरूको व्यावसायिक दक्षता अभिवृद्धि गराउने उद्देश्यले व्यक्तित्व विकास सम्बन्धमा प्रशिक्षण प्रदान गरेका थिए ।

कार्यक्रममा नयाँ बीमा ऐन २०७९ ले अभिकर्ताबारे गरेको कानूनी व्यवस्था सम्बन्धमा र अभिकर्ता इजाजतपत्र आवेदन सम्बन्धमा गरेको व्यवस्थाबारे विस्तृत जानकारी गराइएको थियो ।

समारोहमा प्रमुख कार्यकारी अधिकृतले कम्पनीका सबै संरचनाहरू उत्कृष्ट रहेका, कम्पनीको बोनस दर आकर्षक रहेको जानकारी गराउँदै अभिकर्ताहरूको अथक परिश्रम र मेहनतका कारण नै कम्पनी सधैं अब्बल रहने भएकाले अभिकर्ता सञ्जाललाई अझ व्यावसायिक बनाउन यथाशक्य थप लगानी गर्ने र कम्पनीलाई अग्रस्थानमा पुर्‍याउन महत्त्वपूर्ण भूमिका खेल्ने अभिकर्ता समूहको वृत्तिविकासलाई कम्पनीले सधैं प्राथमिकतामा राख्ने प्रतिबद्धता व्यक्त गरे ।

कम्पनीका वीरगञ्ज शाखाका शाखा प्रमुख प्रकाशकुमार सिंहले सञ्चालन गरेको समारोहमा एमडीआरटी, सीओटी र टीओटीका लक्ष्य पुर्‍याएर सहभागी भएका अभिकर्ताहरूलाई प्रमुख कार्यकारी अधिकृतले सम्मान गरेका थिए ।

बिजनेश लिडरहरूले सम्मान ग्रहण गर्न पाउँदा आफूले गरेको मेहनतको कदर भएको र अत्यन्तै गर्व लागेको बताएका थिए ।