शिक्वल फाउन्डेसनले एनसेल आजियाटा लिमिटेडसँगको सहकार्यमा देशभरका सूचना प्रविधि क्षेत्रमा अध्यनरत छात्रा तथा कार्यरत महिलालाई लक्षित गर्दै ‘ह्याकिङ फर ह्युम्यानिटी’ थिममा नेपालको सबैभन्दा ठूलो महिला ह्याकाथन कार्यक्रमको आयोजना गर्दैछ ।

ह्याकाथन माघ २७ देखि माघ २९ गतेसम्म आयोजना गरिँदैछ । 

विविधता, समानता र समावेशीकरण अर्थात् डाइभर्सिटी, इक्विटी एन्ड इन्क्लुसन (डीईआई) प्रति आफ्नो प्रतिबद्धता अनुरूप एनसेलले शिक्वल फाउन्डेसनसँग नेपालमा हालसम्मकै ठूलो मानिएको यो ह्याकाथनका लागि सहकार्य गरेको छ । ‘यसको प्रमुख उद्देश्य महिलाहरूलाई सञ्चार तथा सूचना प्रविधि क्षेत्रमा प्रोत्साहन गर्नु रहेको छ । यस कार्यक्रमको अन्य साझेदारहरूमा गर्ल्स इन टेक र वुमन इन बिग डेटा रहेका छन्,’ कम्पनीद्वारा प्रेषित विज्ञप्तिमा उल्लेख छ ।

शिक्वल फाउन्डेसनका अनुसार छनोटमा परेका सहभागी महिलाका समूहले स्वास्थ्य, शिक्षा, कृषि लगायतका विभिन्न क्षेत्रमा देखिएका समस्यालाई समाधान गर्न विभिन्न सोलुसन्सका प्रोटोटाइपहरू बनाउने छन् । हाल कार्यक्रमको तयारी स्वरूप काठमाडौं लगायत देशका विभिन्न ठाउँमा कजेल एक्टिभेसनका कार्यहरू भइरहेका जनाइएको छ ।

ह्याकाथनले महिलाहरूलाई सूचना प्रविधि क्षेत्रमा आफ्नो करियर बनाउन र विभिन्न सम्भावनासँग उनीहरूलाई जोड्न महत्त्वपूर्ण योगदान पुर्‍याउने विश्वास एनसेलले लिएको छ । कार्यक्रमले सूचना प्रविधिमा रहेका महिला र नन–बाइनरी ह्याकरहरूलाई एकअर्कासँग सहकार्य गर्न र आफ्ना नविन सोचलाई सोलुसन्समा परिवर्तन गर्न एक प्लेटर्फम प्रदान गर्ने जनाइएको छ ।

ह्याकाथनमा भाग लिन इच्छुक सूचना प्रविधि अध्ययन गरिरहेका छात्रा तथा महिलाहरूले ३ जनाको समूह बनाउन सक्ने र सजिलै कार्यक्रमको रजिस्ट्रेसन कोड स्क्यान गरी एनसेल एपमार्फत समूह दर्ता गर्न सक्ने जनाइएको छ । दर्ता भएका समूहहरू मध्येबाट छानिएका समूहको लिस्ट माघ २० गते घोषणा गरिनेछ ।

कार्यक्रम पूर्व तयारी स्वरूप हाल विभिन्न कलेजमा डिजाइन थिंकिङ, इन्टरप्रेन्युरियल फाइनान्स, बिजनेस मोडल क्यानभास, स्टोरी प्रेजेन्टेसन आइडिया पिचिङ र डेलिभरीमा केन्द्रित हुँदै कार्यक्रमको आयोजना भइरहेका छन् ।

शिक्वल फाउन्डेसनका अनुसार महिला लक्षित पहलहरूले नेपालमा आईटी सम्बन्धित उद्योगहरूमा महिलाहरूको प्रतिनिधित्व र डिजिटल अर्थतन्त्रमा महिलाहरूको समान सहभागितालाई बढाउँछ भने महिलाहरूको व्यक्तिगत र परिवारलाई मात्र नभई समाज र अर्थतन्त्रलाई पनि फाइदा पुर्‍याउन मद्दत गर्दछ ।