नेकपा माओवादी केन्द्रका पदाधिकाकारीहरूले गृहमन्त्री माओवादीले नै राख्नुपर्ने दबाब पार्टी बैठकमा दिएका छन् ।

स्वतन्त्र पार्टीका रवि लामिछानेको सांसद र मन्त्री पद बदर भएपछि गृहमन्त्री माओवादीले नै लिनुपर्ने गरी पार्टीभित्र दबाब बढेको हो । 

सरकारको नेतृत्व गर्ने दलले गृह, अर्थ, परराष्ट्र र कानून जस्ता मन्त्रालय लिनुपर्ने भए पनि त्यो नपाएको गुनासो माओवादीका नेताहरूको छ । स्थायी कमिटीको बैठक स्थगित गरी गृहमन्त्रीको चयन सहितका विषयमा छलफल गर्न केन्द्रित माओवादीको पदाधिकारी बैठकमा उपमहासचिव शक्ति बस्नेत, सचिव हितमान शाक्य र चक्रपाणि खनालले गृह माओवादीले नै राख्नुपर्ने गरी दबाब बढाएका हुन् । 

शक्ति बस्नेत पूर्व गृहमन्त्री समेत हुन् । नागरिकता पुनः पाएपछि राष्ट्रिय स्वतन्त्र पार्टीका रविले फेरि गृहमन्त्रीमा दाबेदारी बढाएपछि उनलाई यो मन्त्रालय नदिई माओवादीले लिनुपर्ने गरी माओवादीभित्रै दबाब बढेको हो । 

रविले नागरिकता लिए पनि उनीमाथि पासपोर्टको विषयमा पनि छानबिनको विषय अगाडि बढ्ने भन्दै माओवादीका नेताहरू हतारमा उनलाई फेरि गृहमन्त्री बनाएर माओवादी पनि बद्नाम हुने तर्क गरिरहेका छन् । उनको मुद्दा किनारा नलाग्दासम्म उनलाई महत्त्वपूर्ण पद दिँदाको जोखिम नलिन पनि प्रधानमन्त्री एवं अध्यक्षको ध्यानाकर्षण गराएका छन् । 

नागरिकता लिएकै दिन रविले आइतवार नेकपा एमाले अध्यक्ष केपी शर्मा ओली र प्रधानमन्त्री प्रचण्डलाई भेटेर गृहमन्त्रीमा पुनः चयन गर्न आग्रह गरेको बुझिएको छ तर उनी अहिले गैरसांसद छन् । गैरसांसद ६ महिनासम्म मन्त्री बन्न पाउँछन् तर ६ महिनाभित्रमा सांसद चुनिनुपर्छ ।

रविले आफ्नो सांसद पद खारेजीमा परेको चितवन–२ बाट उपनिर्वाचन जितेर आउने भन्दै अहिले गृहमन्त्रीमा दाबी बढाएका हुन् तर प्रधानमन्त्रीबाहेक गतिला मन्त्रालय नपाएकोलाई रविलाई यो मन्त्रालय दिन नहुनेमा माओवादीभित्र मत बलियो रहेको बताइन्छ ।

माओवादीको पदाधिकारी बैठकपछि उपाध्यक्ष कृष्णबहादुर महराले गृहमन्त्रीको विषय प्रधानमन्त्रीले टुंगो लगाउने जानकारी दिए । 

‘गृहमन्त्रीको विषयमा प्रवेश गरेर त्यस्तो छलफल भएन । यो सरकार र प्रधानमन्त्रीको विषय हो,’ महराले बैठकपछि भने, ‘गृहमन्त्री को भन्ने टुंगो लगाउने प्रधानमन्त्रीले हो । पार्टीले टुंगो लगाउने होइन तर स्थायी कमिटी बैठकमा पर्सि यसबारे पनि छलफल भने हुन्छ ।’ 

पदाधिकारी बैठकपछि सञ्चारकर्मीले गृहमन्त्री कसलाई बनाउनुहुन्छ भन्ने जिज्ञासा राख्दा प्रचण्ड ‘बनेपछि थाहा हुन्छ’ भन्दै बाहिरिएका थिए । 

रविको सांसद पद खारेज भएपछि गृह मन्त्रालयको जिम्मेवारी प्रधानमन्त्री प्रचण्डले नै सम्हाल्दै आएका छन् ।