सन् २०२४ मा फ्रान्सको पेरिसमा हुन लागेको ग्रीष्मकालीन ओलम्पिकमा रुसी तथा बेलारुसी खेलाडीहरूलाई आफ्नो देशको झण्डाविना तटस्थ रूपमा खेल्न दिने कदमलाई अमेरिकाले समर्थन गरेको छ । 

एएफपी समाचार संस्थाका अनुसार, रुस र बेलारुसका राष्ट्रिय खेलकुद संस्थाहरूलाई अन्तर्राष्ट्रिय खेल महासंघबाट निलम्बन गर्ने कदमलाई अमेरिकाले समर्थन गरेको ह्वाइट हाउसकी प्रेस सचिव कारिन जीन–पिएरले पत्रकारहरूलाई बताइन् । 

तर ती देशका खेलाडीहरूलाई ओलम्पिक जस्ता अन्तर्राष्ट्रिय समारोहमा निमन्त्रण गर्दा उनीहरूले आफ्नो राज्यको प्रतिनिधित्व गरेको देखिन नहुने उनको भनाइ छ । 

‘रुस र बेलारुसको आधिकारिक झण्डा, चिह्न र राष्ट्रिय गानलाई पनि प्रतिबन्ध लगाउनुपर्छ,’ उनले थपिन् ।

युक्रेनले रुसी खेलाडीहरूमाथि पूर्ण प्रतिबन्धको माग गरेको छ भने रुसले आफूविरुद्धका सबै नियन्त्रण खुकुलो बनाउनुपर्ने माग गरेको छ ।