अख्तियार दुरुपयोग अनुसन्धान आयोगले भूमिगत जलस्रोत तथा सिँचाइ विकास डिभिजन कार्यालय बुटवलका तत्कालीन डिभिजन प्रमुख इच्छाकुमार श्रेष्ठसहित ५ जनाविरुद्ध भ्रष्टाचार मुद्दा दायर गरेको छ।

निर्माण नै नभएका आउटलेटका संरचनाहरूको मूल्यांकन गरी ३ लाख ५ हजार ८१० रुपैयाँ बढी भुक्तानी दिएको भन्दै अख्तियारले सोमबार विशेष अदालतमा मुद्दा दायर गरेको हो।

अख्तियारले सोही कार्यालयका इन्जिनियर सन्तोष कुमार दास, महेश निर्माण सेवा बर्दघाट-४ का प्रोप्रराइटर ध्रुवप्रसाद उपाध्याय, महेश निर्माण सेवाका आधिकारिक प्रतिनिधि प्रकाश भट्टराई, महेश इन्जिनियरिङका प्रबन्ध निर्देशक मनोज कुमार खनाललाई प्रतिवादी बनाई मुद्दा दायर गरेको हो।

हुँदै नभएको कार्यलाई भएको भनी भुक्तानी दिएको भन्दै उनीहरूविरुद्ध भ्रष्टाचार मुद्दा दायर भएको अख्तियारका प्रवक्ता श्याम प्रसाद भण्डारीले जनाएका छन्।