महाशिवरात्रि तथा नेपाली सेना स्थापनाको २६० औं वार्षिक उत्सवका अवसरमा नेपाली सेनाले चौथो पटक प्रकाशन गरेको सामरिक लेखरचनाहरुको संग्रह युनिटक्की जर्नलको चौथो संस्करण प्रकाशित गरिएको छ।

आज (बिहीबार) प्रधान सेनापति महारथी श्री प्रभुराम शर्माले जर्नल विमोचन गरेका हुन्।

बौद्धिक वर्ग, प्राध्यापक र शोधकर्ताहरुलाई सहभागी गराई राष्ट्रिय महत्वका सामरिक विषयहरुमा आधारित रही सञ्चालन गरिएको खला सामरिक लेखरचना प्रतियोगिता(२०७९ का उत्कृष्ट २६ वटा लेखरचनाहरुलाई समावेश गरी उक्त जर्नल प्रकाशन गरिएको हो ।     

२६ जना प्रतियोगीहरूका लेख रचनाहरु समावेश गरी प्रकाशन भएको सो जर्नलमा प्रकाश विष्‍ट, मानार्थ उपरथी पदम बहादुर सिंह (अप्रा) र डा. हिन्दु संस्कृति कार्कीद्वारा लिखित लेख रचनाहरु क्रमशः प्रथम, द्वितिय र तृतिय भए।

प्रधान सेनापति महारथी शर्माबाट क्रमशः उनीहरूले २ लाख, १ लाख ५० हजार, र १ लाख रुपैयाँ नगद पुरस्कार तथा कदरपत्र प्राप्त गरेका छन् ।

विमोचन कार्यक्रममा प्रधान सेनापति महारथी शर्माले अन्य लेखकहरुलाई समेत पुरस्कार तथा कदरपत्र प्रदान गरेका थिए।

विमोचन कार्यक्रममा बलाध्यक्ष रथी श्री सीताराम खड्का, प्राध्यापक वर्ग, रथीवृन्द, युनिटी जर्नलका विषय विज्ञ तथा सम्पादकहरु, लेखकहरु लगायत नेपाली सेनाका अधिकृतहरुको उपस्थिति रहेको थियो।

यस किसिमको प्रतियोगिताबाट राष्ट्रका बौद्धिक तथा शिक्षित वर्गमा राष्ट्रिय सुरक्षाका विभिन्‍न आयामहरुमा खोज र अध्ययन गर्ने बानीको विकास भई राष्ट्रप्रेम तथा राष्ट्रिय सुरक्षा सम्बन्धमा चासो तथा चिन्तन वृद्धि हुँदै जाने विश्वास नेपाली सेनाले लिएको छ ।