नेकपा (एकीकृत समाजवादी) का सांसद प्रकाश ज्वालाले राष्ट्रपतिको पदका लागि आफ्नो पार्टीको दाबी रहेको बताएका छन्। 

बुधवार संघीय संसद भवन नयाँ बानेश्वरमा सञ्चारकर्मीसँग कुराकानी गर्दै सांसद ज्वालाले राष्ट्रपतिका लागि पार्टी अध्यक्ष माधवकुमार नेपाल योग्य भएको बताए।

उनले नेपालले संविधान निर्माणमा खेलेको भूमिका, देशको निम्ति गरेको योगदानका कारण उनको चर्चा हुनु स्वाभाविक भएको बताए। 

उनले भने, ‘हाम्रो पार्टीका अध्यक्ष वा हाम्रो पार्टीका नेता राष्ट्रपतिका निम्ति योग्य हुनुहुन्न भन्ने कुरा पनि भएन । त्यसका निम्ति योग्य नै हुनुहुन्छ । पटक–पटक प्रधानमन्त्री भएर अनुभव गरेका व्यक्तिहरू, संविधान निर्माणमा भूमिका खेलेका व्यक्तिहरू र राष्ट्रका निम्ति धेरै ठूलो योगदान गरेका व्यक्तिहरू हुनुहुन्छ। त्यसैले उहाँहरूको चर्चा हुने कुरा पनि स्वाभाविक हो ।'

उनले थपे, 'जुन हैसियत हाम्रो नेताहरूको छ, त्यो हैसियतअनुसार र अहिले जुन पछिल्लो समयमा राष्ट्रिय सहमतिका साथ राष्ट्रपतिको निर्वाचन गरौँ भन्ने विषय छलफलमा छ, त्यस हिसाबले हेर्‍यौं भने राष्ट्रिय सहमति जुट्न सक्ने उपयुक्त दल वा उपयुक्त पात्र पनि हाम्रो पार्टीकै नेता हुन सक्छन् भन्ने हिसाबले यसमा पनि हामी ओपन नै छौँ ।’

उनले राष्ट्रपतिमा राष्ट्रिय सहमति हुन उपयुक्त दल आफूहरू भएको र उपयुक्त पात्र पनि अध्यक्ष माधवकुमार नेपाल भएको बताए।