प्रधानमन्त्री पुष्पकमल दाहाल 'प्रचण्ड'ले आईसीसी विश्वकप लिग २ विजेता खेलाडीलाई प्रतिव्यक्ति २ लाख रुपैयाँ पुरस्कार दिने घोषणा गरेका छन्। 

बुधबार दिउँसो विजेता खेलाडीहरूलाई बालुवाटार बोलाएर प्रधानमन्त्रीले बधाई दिनुका साथै पुरस्कार दिने घोषणा गरेका हुन्। 

खेलाडीहरूलाई बधाई दिँदै प्रचण्डले भने, 'सर्वप्रथम इतिहास रच्नुभएकोमा तपाईहरूलाई बधाई छ। तपाईंहरूले नयाँ रेकर्ड बनाउनुभएको छ, इतिहास रच्नुभएको छ। चार खेलमा पूरै विजय हासिल गरेर क्लिनस्वीप गर्नुभएको छ। यो देशकै गौरव हो।'

प्रचण्डले थपे, 'तपाईहरूलाई प्रेरणा मिलोस् भनेर मैले नेपाल सरकारको तर्फबाट प्रतिखेलाडी २ लाख पुरस्कार दिने घोषणा गर्दछु।'

पहिला खेल जीवनका लागि, अनुशासनका लागि भने पनि अब खेल देशका लागि भएको उनले बताए। 

प्रचण्डले भने, 'अर्थतन्त्रको उत्थानका लागि भएको छ, राष्ट्रिय प्रतिष्ठाका लागि भएको छ, कूटनीतिक उचाइका लागि पनि भएको छ। तसर्थ, खेल क्षेत्रलाई सामान्य आँखा हेर्नु देशकै लागि गल्ती हुन जान्छ।'