रंगको पर्व होलीमा काठमाडौँस्थित सिल्भर ओकमा ‘होली कार्निबेल’ फेस्टिभल हुने भएको छ ।

फागु पूर्णिमाको अवसरमा सोमबार (२२ गते) काठमाडौँस्थित गैह्रीधारास्थित सिल्भर ओकमा विभिन्न सांगीतिक कार्यक्रम फेस्टिभल हुने भएको हो ।

युनिफाइ नेपालको व्यवस्थापनमा सोलीस र आर्बिट्रेयरी एकसाथ फेस्टिभल गर्न लागेको हो ।

फेस्टिभलमा विभिन्न मुलुकका डिजेसहित नेपालका डिजेहरूको सहभागिता रहने इभेन्टका म्यानेजर रविन श्रेष्ठले जानकारी दिए । पूर्व मिस नेपाल माल्भिका सुब्बाले कार्यक्रम होस्ट गर्ने छिन् ।

उनका अनुसार  इभेन्टमा सहभागी हुन चाहनेले ‘खल्ती’ एपबाट टिकट खरिद गर्न सक्छन् । टिकट मूल्य १५ सय रुपैयाँ रहेको छ । इभेन्ट बिहान १० बजेदेखि सुरु हुनेछ ।

इभेन्ट पारिवारिक वातावरणमा हुनेछ । अभिभावकले आफ्ना बच्चाहरूलाई लगेर मनोरञ्जन दिन सक्छन् । सर्कस सो, फन गेम र विभिन्न खानाका स्टलसमेत हुनेछन् ।

‘नेपालमा अहिलेसम्मकै व्यवसायिक रूपमा सबैभन्दा ठूलो इभेन्ट गर्न लागिएको छ । हामीले इभेन्टका लागि फरक तरिकाले सजावट गरेका छौ,’ उनले भने,’ फेस्टिभलमा प्रोडक्सनको डिजाइन आकर्षक ढंगले बनाइने छ । होली पर्व व्यवस्थित तरिकाले मनाउन सबै आयोजक लागिरहेका छौ ।‘

मनोरञ्जनात्मक गतिविधि समेत सञ्चालन गर्ने तयारीमा रहेको श्रेष्ठले जानकारी दिए ।