विश्वविख्यात फुटबलर लियोनल मेसीले अर्जेन्टिनाका लागि १०० गोलको कोशेढुंगा पार गरेका छन् । 

बुधबार बिहान काराकाओविरुद्ध ह्याट्रिक गर्ने क्रममा मेसीले देशका लागि १०० गोल संख्या पार गरे। 

मेसीले १७३ खेल खेल्दा व्यक्तिगत गोल संख्या १०२ बनाएका हुन्। 

१९८ खेलमा १२२ गोल गर्ने पोर्चुगलका क्रिश्चियानो रोनाल्डो र १४८ खेलमा १०९ गोल गर्ने इरानका अलि दाइ मात्र मेसीभन्दा अगाडि छन् । 

विश्व फुटबलमा थोरैले मात्र राख्न सक्ने कीर्तिमान बनाउँदा मेसीले विभिन्न ३७ देशविरुद्ध गोल गरेका छन् । यस क्रममा मेसीले ब्राजिल, स्वीटजरल्याण्ड, ग्वाटेमाला, पानामा, इक्वेडर, हैटी, बोलिभिया र काराकाओविरुद्ध ह्याट्रिक गरेका छन् ।

इस्टोनियविरुद्ध भने मेसीले ५ गोल गरेका छन् । 

मेसीले अलग ३७ देशमध्ये सबैभन्दा बढी ८ गोल बोलिभियाविरुद्ध गरेका छन् । इक्वेडर र उरुग्वेविरुद्ध ६/६ गोल गरेका छन् । 

मेसीले ब्राजिल, चिली, पाराग्वे, भेनेजुएला र इस्टोनियाविरुद्ध ५-५ गोल गरेका छन् । 

मेक्सिको र पानामाविरुद्ध ४-४ गोल गरेका छन् । मेसीले कोलम्बिया, काराकाओ, क्रोएसिया, फ्रान्स, ग्वाटेमाला, हैटी, नाइजेरिया र स्वीटजरल्याण्डविरुद्ध गोलसंख्या ३-३ छ । 

मेसीले अल्जेरिया, हङकङ, होण्डुरस, जमैका, निकारागुआ र स्पेनविरुद्ध समान २-२ गोल गरेका छन् । 

जर्मनी, नेदरल्याण्ड्स, पोर्चुगल, पेरु, अमेरिका, सर्विया, साउदी अरेबिया, अल्बानिया, अष्ट्रेलिया, बोस्निया, इरान, स्लोभेनिया र यूएईविरुद्ध उनले समान १-१ गोल गरेका छन् । 

मेसीले २००५ मा राष्ट्रिय टोलीमा डेब्यु गरेका हुन् । १७ वर्ष फुटबल खेल्दा उनले राष्ट्रिय टिमबाट ३७ देशविरुद्ध खेल्दा १०२ गोल गरेका हुन् ।

राष्ट्रिय टिम र व्यावसायिक सबैमा गरी उनको गोल संख्या भने ८०० नाघेको छ। ८ सय गोल कटाउनेमा पनि पनि मेसी रोनाल्डोपछि दोस्रो हुन् । 

मेसीप्रेरित अर्जेन्टिनाले विश्वकप र कोपा अमेरिका जस्ता प्रतिष्ठित उपाधि जितेको छ । 

मेसीकै प्रेरणामा सन् २०२२ मा अर्जेन्टिनाले कतारमा विश्वकपको उपाधि उचालेको थियो । उनले प्रतियोगितामा ७ गोल गरेर विश्वकपको सर्वोत्कृष्ट खेलाडीको अवार्ड जिते ।

उनले २०१४ मा अर्जेन्टिनालाई फाइनलमा पुर्‍याएका थिए। 

पटकपटक टिमलाई कोपाको फाइनलमा पुर्‍याए पनि सन् २०२१ मा भने उनले उपाधि जिताएका थिए। 

क्लबतर्फ भने उनले लामो समय स्पेनको बार्सिलोनाबाट खेले । बार्सिलोनाबाट ५२० खेल खेल्दा मेसीले ४७४ गोल गरेका थिए । २०२१ मा पीएसजी पुगेका मेसीले ४९ खेलमा १९ गोल गरिसकेका छन् । 

यस क्रममा मेसीले विश्वकप फुटबलका २६ खेलमा १३ गोल, कोपा अमेरिकाका ३४ खेलमा १३ गोल, विश्वकप छनोटका ६० खेलमा २८ गोल, मैत्रीपूर्ण ५३ खेलमा ४८ गोल गरेका छन्। 

उनले युईएफए र कोन्मेबोलको एउटा प्रतियोगितामा मात्रै गोल गर्न सकेका छैनन् । 

मेसीले २००५ मा डेब्यु गरेको वर्ष २ खेल खेल्दा पनि कुनै गोल गर्न सकेका थिएनन् । तर त्यसयता १८ वर्षमा मेसी कुनैमा पनि गोलविहीन बनेका छैनन्। मेसीले २०२२ मा १८, २०१२ मा १२ र २०२१ मा ९ गोल गरेका छन् ।