लुम्बिनी प्रदेशमा मुख्यमन्त्री लीला गिरी सोमवारदेखि शुरू प्रदेशसभा बैठक छल्दै आएका छन् ।

पहिलो अधिवेशनको सोमवार र मंगलवार बसेको सातौं र आठौं बैठकमा गिरी उपस्थित भएनन् । सदनमा समसामयिक विषयमा बोल्दै सांसदहरूले मुख्यमन्त्री गिरी मुख्यमन्त्री कार्यालयमा रहे पनि सभामा उपस्थित नभएको दाबी गरे । 

वर्तमान सत्ता गठबन्धनले १२ चैतमा मुख्यमन्त्री गिरी नेतृत्वको सरकारलाई दिएको समर्थन फिर्ता लिएपछि उनी अल्पमतमा छन् । सदनमा विपक्षी नेताहरू विशेष समयमा बोल्दै मुख्यमन्त्री गिरीलाई राजीनामा दिएर नयाँ सरकारको लागि मार्ग प्रशस्त गर्न आग्रह गर्दै आएका छन् । 

मंगलवारको बैठकमा कांग्रेस सांसद बादशाह कुर्मीले अल्पमतले बहुमतलाई शासन गर्न सम्भावना नभएकोले मुख्यमन्त्री गिरीलाई मार्गप्रशस्त गर्न आग्रह गरे ।

अर्का सांसद राजु खनालले बहुमत गुमाएको सरकारले बहिर्मन गरी नैतिकता देखाउन आग्रह गरे ।

कांग्रेस सांसद बसिउद्दिन खाँले मुख्यमन्त्री कार्यालयमा बसेर मुख्यमन्त्री सदनमा आउने आँट गर्न नसकेको आरोप लगाए । 

एमाले प्रमुख सचेतक तुलसीप्रसाद चौधरीले गठबन्धनलाई नैतिकताको पाठ सिकाउन सुझाए । सरकारले बहुमत सिद्ध गर्न नसके स्वाभाविक रूपमा मुख्यमन्त्रीले राजीनामा दिनुपर्ने उनले बताए ।  

‘यो संविधानको धारा १६८ (२) बमोजिम बनेको सरकार हो’, चौधरीले भने, ‘यो सरकार फेजआउट हुन्छ भने धारा ३ मा प्रवेश गर्छ । फर्केर फेरि धारा २ मा जाँदैन । धारा ३ मा जादाखेरि फेरि ठूलो दलको हैसियत जो छ उसैले सरकार बनाउने अवसर प्राप्त गर्छ ।’

प्रदेशसभामा एमाले २९ सांसदसहित पहिलो दल हो । प्रदेशसभाको अर्को बैठक आगामी २०८० वैशाख ९ गते शनिवार १ बजे बोलाइएको छ ।