राष्ट्रिय प्रजातन्त्र पार्टीका प्रमुख सचेतक ज्ञानबहादुर शाहीले वास्तविक मिटरब्याजी सरकार आफैं भएको आरोप लगाएका छन्। 

प्रमुख सचेतक शाहीले जुम्लालगायत माथिल्लो कर्णालीका निर्माण व्यवसायीको बजेट बैंकमा राखेर सरकारले चर्को ब्याज खाइरहेको उल्लेख गर्दै तत्काल त्यसको निकासा गर्न पनि माग गरे।

बुधबार प्रतिनिधिसभा बैठकमा उनले सो बजेट रोक्का गर्नुको कारणबारे एक हप्ताभित्र संसदमा जवाफ दिन सरकारसँग माग गर्दै जवाफ नआए आफ्नो पार्टीले सदन नै अवरुद्ध पार्ने चेतावनीसमेत दिए।

प्रमुख सचेतक सांसद शाहीले भने, ‘सरकार भन्छ–मिटरब्याजीको समस्या समाधान भयो । हिजो मात्रैको घटना हो । जुम्लालगायत माथिल्लो कर्णालीका निर्माण व्यवसायीहरू झुण्डिन तयार छन् । सरकारले मिटरब्याजीहरूलाई कारबाही गर्छु भनेर बास्तविक मिटरब्याजी यो सरकार हो । यसको डाटा सम्माननीय सभामुख महोदय । नेपाल सरकारले अहिले फिक्स डिपोजित मात्रै, राज्यको पैसा मात्रै २ खर्ब ११ अर्ब रुपैयाँ फिक्स डिपोजिट गरेको छ । झण्डै सरकार बचत आज निर्माण व्यवसायी वा अन्यलाई रकम नदिएर ३ खर्ब ६२ अर्व ७७ करोड रुपैयाँ सरकारी खातामा राखेर आज ब्याज खाइरहेको छ ।'

अहिले पनि सरकारले ८.५ प्रतिशत ब्याज सरकारी रकम राखेर आज दिइरहेको उनले बताए।

'अहिले झण्डै सय जनाभन्दा बढी मान्छेहरू अहिले बेलैमा बैंकको ब्याज तिर्न नसकेर आज मृत्युवरण गरिराख्नुपरेको छ । आज वास्तविक मिटरब्याजी यो सरकार भएको छ । र, यो पछिल्लो तथ्यांकलाई मात्रै हेर्ने हो भने यो ८ महिनामा चालु खर्च मात्रै सरकारले ५१.४६ प्रतिशत, पुँजीगत खर्च २२.१५ प्रतिशत र व्यवस्थापन खर्च ३७.४१ प्रतिशत गरेको छ । भएभरको पैसा असारमा मात्रै खर्च गर्ने पुँजीगत खर्च ७८ प्रतिशत खर्च गर्न बाँकी छ,' शाहीले भने।

सरकारले भएभरको पैसा बैंकमा राखेर ब्याज खाएर अरूलाई मिटरब्याजी भन्न नहुने उनको भनाइ थियो।