राष्ट्रिय स्वतन्त्र पार्टीकी सांसद डा. तोसिमा कार्कीले सांसदहरूले उठाएका प्रश्न पनि वेबसाइटमा राख्ने व्यवस्था गर्न माग गरेकी छन् । मंगलबार प्रतिनिधिसभा बैठकमा बोल्दै सांसद कार्कीले सांसदहरूले उठाएका प्रश्नको जवाफ सरकारले नदिएको गुनासो गर्दै ती प्रश्न र त्यसको अवस्थाबारे आम नागरिकले हेर्नेगरी वेबसाइटमा राख्ने व्यवस्था गर्न उनले माग गरेकी हुन् ।

सरकारलाई सदनप्रति र सदनलाई जनताप्रति उत्तरदायी बनाउन आवश्यक रहेको उनको भनाइ छ । ‘हामी संसद्‍मा आइपुग्न निर्वाचनमा अर्बौ खर्च हुन्छ । एक दिनको संसद् बैठकमा लाखौं खर्च हुन्छ,' उनले भनिन्, 'आर्थिक पक्षभन्दा पनि नागरिकको मूल्यवान आशा, भरोसा र विश्वास जोडिएको हुन्छ। हामी प्रश्न उठाउँछौं, उत्तर आउँदैन । सरकारलाई सदनप्रति र सदनलाई जनताप्रति उत्तरदायी बनाउन आवश्यक छ । के–के प्रश्न उठे, तिनको अवस्था के छ ? आम नागरिकले हेर्नेगरी वेबसाईटमा राख्ने व्यवस्था मिलाइयोस् ।’ सांसद कार्कीले सरकारका मन्त्रीहरूले सांसदहरूले उठाएका प्रश्नको जवाफ नदिएकोमा आपत्तिसमेत जनाइन् ।