मधेश प्रदेशको भौतिक पूर्वाधार विकास मन्त्रालयका सचिव कृष्ण कुमार मिश्रसहित १२ जना कर्मचारीलाई केही ठेकेदारले कार्यकक्षमै साढे दुई घण्टासम्म थुनेका छन् । 'मुख्यमन्त्री स्वच्छता अभियान'अन्तर्गत १ सय २० करोड रुपैयाँको ठेक्का पाएका ३८ वटा योजनाको भुक्तानी बाँकी रहेको भन्दै ठेकेदारको समूहले सचिवको कार्यकक्षमा बैठक गरिरहेका कर्मचारीहरूलाई थुनेका हुन् । 

ठेकेदारहरूले सचिवको कार्यकक्षअगाडि बाहिरबाट ल्याएका फोहरसमेत थुपारिदिएको त्यहाँका एक कर्मचारीले लोकान्तरलाई जानकारी दिए । 'ठेकेदार खुशीलाल ठाकुरको नेतृत्वमा आएका ठेकेदारहरूले झन्डै १ बजे ती सचिवज्यूको कार्यकक्षअगाडि बाहिरबाट ल्याएको फोहर थुपारिदिएका छन्,' मन्त्रालयका एक कर्मचारीले लोकान्तरसँग भने,'त्यसपछि उनीहरूले सचिवज्यूको कार्यकक्षको ढोका बाहिरबाट लगाइदिएका थिए ।'

आफूहरूलाई थुनेको कुरा सत्य रहेको सचिव मिश्रले पुष्टि गरेका छन् । 'उहाँहरूको ठेक्काको म्याद थपसहित भुक्तानीको विषयमा केही समस्याहरू छन्,' सचिव मिश्रले भने,'हिजो उहाँहरू त्यसै विषयमा डेलिगेसन पनि आएकाले आज हामी सबै इन्जिनियर, डीईसहित बैठक बसिरहेकै बेला हामीलाई बाहिरबाट थुनेर उहाँहरूले अराजकता देखाउनुभयो ।'

झन्डै साढे दुई घण्टा जति थुनिएपछि आफूहरूले प्रहरीलाई बोलाएर ढोका खोल्न लगाएको उनले सुनाए ।

'अहिले ४ बजे प्रहरीको सहयोगमा ढोका खोलेपछि ती ठेकेदारहरूसँग छलफल भइरहेको छ,' मिश्रले भने,'१२० करोडको ३८ वटा योजनामध्ये ७० करोड रुपैयाँ भुक्तानी हुन बाँकी छ ।'

शुरुमा उक्त काम मुख्यमन्त्री तथा मन्त्रिपरिषद कार्यालयबाट नै भए पनि अहिले उक्त काम भौतिक मन्त्रालयलाई हस्तान्तरण गरिएको छ ।

'सोही विषयमा कतिपय फाइल मुख्यमन्त्री कार्यालयबाटै अख्तियार दुरुपयोग अनुसन्धान आयोगमा पुगेकोले हामीकहाँ ती योजना सम्बन्धित धेरै फाइल पनि छैनन्,' सचिव मिश्रले थपे,'कतिपय फाइल नै अधुरो रहेकाले ठेक्काको म्याद थप तथा भुक्तानी नहुँदा ठेकेदारहरूले हामीलाई आज थुने ।'

मुख्यमन्त्री कार्यालयसँग फाइल विषयमा लेखी पठाउँदा कानून बमोजिम गर्नु भनेर जवाफ आउने गरेको उनले बताए ।