अर्थमन्त्री डा. प्रकाशशरण महतले आफू अप्ठ्यारो समयमा अर्थमन्त्री भएको बताएका छन् । 

दुप्चेश्वर गाउँपालिका नाम्सापुराण नुवाकोटस्थित छेवाङ ग्लान ङाछर्यालिङ गुम्बामा गुरु पद्म्सम्भव मूर्तिको प्राण प्रतिस्थापन तथा समुद्घाटन कार्यक्रममा बोल्दै उनले भने, ‘हामीसँग राजस्वबाट प्राप्त हुने आम्दानी यो वर्ष थोरै छ । यो थोरै आम्दानीलाई देशैभरिको विकास निर्माणमा पुर्‍याउनु पर्ने हुन्छ । स्रोतको समस्या छ, यसका बाबजुद जे सम्भव हुन्छ, मबाट काम हुनेछ ।’

मन्त्री डा. महतले ‘नेपाली कांग्रेसले विकास निर्माणलाई सधैं प्राथमिकता दिँदै आएको बताएका छन् । ‘कांग्रेस जहिले सरकारमा हुन्छ, त्यसबेला जनताको पीरमर्का, आवश्यकता र विकास निर्माणलाई प्राथमिकतामा राखेको हुन्छ’ उनले भने ।

‘दुप्चेश्वर गाउँपालिकामा केही समय अगाडि कुनै पूर्वाधार थिएन । पुल, सडकलगायतका विविध पूर्वाधारको विकास भएको छ, शिवपुरी क्षेत्रमा व्यापक विद्युतीकरण भएको छ’, उनले भने, ‘अहिले पनि यहाँको विकास निर्माण, जनताको आवश्यकता, बाह्रै महिना चल्ने बाटो निर्माण हो, अप्ठ्यारो पर्दा, बालबालिकालाई स्कुल जाँदा कुनै समस्या नआओस् भन्ने हो, त्यसैले पूर्वाधार विकासलाई सरकारले प्राथमिकतामा राखेको छ ।’

‘अहिले यहाँ दुईवटा महत्वपूर्ण बाटो निर्माण भएको छ । प्रदेश सरकारको लगानीमा सिधैं राजधानी काठमाडौं–खोले गाउँ–महाकाली हुँदै दुप्चेश्वर जोडिँदैछ । ट्रयाक जोडिसकेको छ, अब पक्की बाटो बन्दैछ । केन्द्र सरकारको लगानीमा गंगटे त्रिशुलीदेखि नै गोल्फु भञ्ज्याङसम्म जाने बाटो बनेको छ’ अर्थमन्त्री डा. महतले भने ।