नेपाली सेनाले सञ्चालन गरेको सफा हिमाल अभियानका क्रममा हालसम्म झण्डै ३६ हजार किलो फोहोर संकलन गरिएको छ ।

सैनिक जनसम्पर्क तथा सूचना निर्देशनालयका अनुसार सफा हिमाल अभियान २०२३ मा ३५ हजार किलो फोहोर संकलन गर्ने लक्ष्य रहेको थियो । 

हालसम्म अन्नपूर्ण हिमालबाट ३ हजार ५६७ किलो, बरुञ्चे हिमालबाट १८ हजार ५२० किलो र सगरमाथा तथा ल्होत्सेबाट १३ हजार ६२१ किलो गरी जम्मा ३५ हजार ७०८ किलो फोहोर संकलन भइसकेको निर्देशनालयले जानकारी दिएको छ । 

सगरमाथा र ल्होत्से हिमाल सफाईका लागि सगरमाथाको आधार शिविरमा तैनाथ नेपाली सेनाको टोली सफाइ कार्यसम्पन्न गरी फिर्ता हुने क्रममा रहेको पनि नेपाली सेनाले जानकारी दिएको छ । विश्व वातावरण दिवसमा काठमाडौंमा औपचारिक कार्यक्रमको आयोजना गरेर अभियानको समापन गरिनेछ । 

सफा हिमाल अभियान २०२३ अन्तर्गत सगरमाथा र ल्होत्से हिमाल सफाइ तथा आरोहणका सिलसिलामा अस्वस्थ भई उपचाररत नेपाली सेनाका ४ जनालाई थप उपचारको लागि भारत लगिएको छ । अभियानका क्रममा २ शेर्पा सहयोगीको निधन भएको छ ।