इन्डियन प्रिमियर लिग (आईपीएल) क्रिकेटको फाइनल खेल आज हुँदैछ । भारतको अहमदाबादस्थित नरेन्द्र मोदी स्टेडियममा स्थानीय समयअनुसार साँझ साढे ७ बजेबाट खेल शुरू हुनेछ । 

फाइनल खेलमा उपाधिका लागि महेन्द्रसिंह धोनी कप्तान रहेको चेन्नई सुपर किंग्स र हार्दिक पाड्या कप्तान रहेको गुजरात टाइटन्सबीच प्रतिस्पर्धा हुनेछ ।

यसपालिको आईपीएलमा पहिलो खेल खेलेका दुवै टीम फाइनलसम्म पुगेर उपाधिका लागि भिड्दैछन् । चालू सिजनको पहिलो खेल चेन्नई र गुजरातबीच ३१ मार्चमा अहमदाबादमा खेलिएको थियो । 

दुई टिम फाइनलमा भिड्न लागेको पहिलोपटक हो । गुजरातको यो दोस्रो सिजन हो । अघिल्लो सिजनमा विजेता बनेको थियो । 

नरेन्द्र मोदी स्टेडियम गुजरातको होम ग्राउण्ड हो । यो मैदानमा गुजरातले अहिलेसम्म नौ खेल खेलेको छ । जसमा ६ खेलमा जित र तीनमा हार व्यहोरेको छ । 

यस्तै चेन्नईले यस मैदानमा खेलेका तीनै खेल हारेको छ । 

हेड टु हेडमा गुजरात अगाडि देखिएको छ । दुई टिमबीच अहिलेसम्म चार खेल खेलिएकामा तीन गुजरातले जितेको छ भने एक खेलमा मात्रै चेन्नईले जितेको छ । 

नरेन्द्र मोदी स्टेडियम ब्याटिङका लागि राम्रो मानिन्छ । फास्ट बलरका लागि बाउन्स हुन्छ भने आउटफिल्ड पनि तेज हुन्छ । 

यस सिजनमा नरेन्द्र मोदी स्टेडियममा कूल आठ खेल खेलिएका छन् । जसमा गुजरातले पाँचमा जित र तीनमा हार व्यहोरेको छ । 

यहाँ पहिले ब्याटिङ गर्ने टिमले पाँचपटक जितेको छ भने जवाफी ब्याटिङ गर्ने तीनपटक मात्रै जित हात पारेको छ ।