काठमाडौं महानगरपालिकाले आगामी आर्थिक वर्षदेखि सबै सेवा अनलाइन प्रणालीमार्फत प्रदान गर्ने भएको छ ।

त्यसका लागि काठमाडौं महानगरले १५ करोड बजेट विनियोजना गरेको आइतवार आगामी आर्थिक वर्ष २०८०/८१ को बजेट प्रस्तुत गर्दै कामपाको उपप्रमुख  सुनिता डङ्गोलले जानकारी गराइन् ।

‘सुशासनका लागि अनलाइन सेवा’ भन्ने नाराका साथ कार्यक्रम सञ्चालन गर्न लागिएको उपप्रमुख डङ्गोलले जानकारी दिइन् । ‘महानगरले देख्छ’ योजनालाई गौरवको आयोजनाका रूपमा विकास गरी त्यसका लागि २० करोड रुपैयाँ विनियोजन गरिएको छ । 

कामपाले आफ्नै टेलिभिजन सञ्चालनमा ल्याउने भएको छ । उक्त विषयलाई आगामी आवको बजेटमा नै समावेश गरिएको छ । टेलिभिजन स्थापनाका लागि महानगरले ५ करोड रुपैयाँ विनियोजन गरेको छ ।   

कामपाले एक टोल एक खेलकुद पूर्वाधार कार्यक्रम सञ्चालन गर्ने भएको छ । त्यसका लागि १० करोड ५० लाख विनियोजन गरिएको छ । २५ अर्ब ५४ करोडको कूल बजेट ल्याएको कामपाले विगतका वर्षमा जस्तै यस वर्ष पनि भौतिक पूर्वाधार क्षेत्रमा सबैभन्दा बढी ७ अर्ब ३४ करोड बजेट विनियोजन गरिएको छ । शिक्षामा १ अर्ब ३२ करोड र स्वास्थ्यमा ९२ करोड ६६ लाख रुपैयाँ बजेट विनियोजन गरिएको छ ।