राष्ट्रिय स्वतन्त्र पार्टी (रास्वपा) सांसद मनिष झाले आफूहरूले प्रधानमन्त्री पुष्पकमल दाहाल ‘प्रचण्ड’को राजीनामा नमागेको बताएका छन् ।

बुधवार प्रतिनिधिसभा बैठकपछि सञ्चारकर्मीहरूसँग कुराकानी गर्दै सांसद झाले आफूहरूले प्रमुख प्रतिपक्ष दल नेकपा एमालेसँग लागेर प्रधानमन्त्री दाहालको राजीनामा नमागेको बताए । उनले प्रधानमन्त्री दाहालको अभिव्यक्ति संसद्, लोकतन्त्र र निर्वाचन प्रक्रियालाई अवहेलना गर्ने गरी आएको भन्दै यसप्रति रास्वपाको प्रश्नहरू रहेको र सोही प्रश्नका लागि संसद् बैठकमा उठेको स्पष्ट पारे ।

उनले आफूहरूलाई प्रधानमन्त्रीको अभिव्यक्तिप्रति आशंका रहेको भन्दै सोही विषयमा स्पष्ट हुन चाहेको उल्लेख गरे ।

उनले भने, ‘अरु दलले राजीनामा मागेको कुराको जिम्मेवारी हामी लिदैनौं । हामीले बोल्नै पाएका छैनौं भनेपछि हामीले के माग्यौं भन्ने कुरा कसरी आकलन गर्नुहुन्छ ? एकैतिर बसेको भएकाले उहाँहरू पनि उठ्नुभयो । हामी पनि उठ्यौं तर हामी फरक बेन्चमा बस्छौं । उहाँहरू फरक तरिकाले बस्नुहुन्छ । उहाँहरूको राजनीतिक अस्तित्व र परिचय सदनमा फरक छ । त्यसैले गर्दा मिडियाले पटक–पटक हामीलाई एमालेसँग जोडेर जुन हाम्रो परिचय स्थापित गर्न खोजिरहेको छ, त्यो गलत हो । हामी फरक मत, फरक पहिचान, फरक सिद्धान्तले र फरक दलको परिचयले त्यहाँ पुगेका छौं । हामी उभिँदै गर्दा उहाँहरू पनि उभिनुहुन्छ भने उहाँहरूको साथमा उभिएको होइन । हामीले प्रधानमन्त्रीको राजीनामा मागिरहेका छैनौं । केही कुराहरूमा हाम्रो आशंका छ, आक्रोश छ, त्यो कुरालाई प्रधानमन्त्रीले आएर स्पष्ट पारिदिनुपर्छ । प्रधानमन्त्रीले सार्वभौम सदन र यसको राजनीतिक प्रक्रिया, लोकतान्त्रिक प्रक्रिया, निर्वाचन प्रक्रिया सबैलाई अवहेलना गर्ने अभिव्यक्ति दिनुभएको छ । त्यो अभिव्यक्ति भावनात्मक रूपमा यत्तिकै आएर, उहाँले विवेक गुमाएर बोल्नुभएको हो कि कुन तर्कले बोल्नुभएको हो ? त्यो स्पष्ट पार्न चाहन्थ्यौं तर हामीले बोल्ने मौका पाएनौं ।’

उनले मिडियाले रास्वपालाई एमालेले गर्ने गतिविधिसँग जोडेर हेर्ने गरेकोप्रति असन्तुष्टि व्यक्त गरे । उनले आफूहरूको फरक पहिचान र सिद्धान्त रहेको उल्लेख गर्दै फरक दलको परिचयसाथ आफूहरू संसदमा रहेको स्पष्ट पारेका छन् ।