हिजोआज रिलिजको केही समय हिट भएका गीतको चर्चा केही महिनामै सेलाउने गरेको छ । गतवर्ष रिलिज भएर युट्युबमा लाखौं भ्युज पाएका थुप्रै गीतहरू छन्, जसलाई स्रोता/दर्शकले बिर्सिसकेका हुन सक्छन् । तर, पहिले–पहिले यस्तो हुँदैनथ्यो । गीतलाई श्रोताले रुचाएपछि कालजयी बन्थे । त्यसैले त पुराना गीतहरू अहिले पनि स्रोता दर्शकले उत्तिकै गुनगुनाउने गरेका छन् । 

अग्रज लोकगायक प्रेमराजा महत भन्छन्, ‘हाम्रा पुराना गीतहरू अहिले पनि स्रोताहरुले गाएर रमाइलो गरेको देख्छु । विभिन्न ठाउँमा पुग्दा उहाँहरूले पुराना गीतहरूको चर्चा गर्नुहुन्छ । तर, ति गीतहरू भन्दा करोडौं बढीले युट्युबमा हेरेका पछिल्ला गीतहरू एक/दुई वर्षमै स्रोता–दर्शकले बिर्सिसकेको पाउँछु ।’ 

हिजोआज हिट भएका गीतहरू पनि किन स्रोता–दर्शकले चाँडै बिर्सिन्छन् भन्ने कुरा उनको मनमा जिज्ञासाका रुपमा खेलिरहेको हुन्छ । 

यद्यपि, राम्रो सिर्जना नआएर कालजयी नबनेको कुरामा भने उनी पूर्णरुपमा सहमत छैनन् । किनकी नयाँ पुस्ताका कलाकारहरूले पनि राम्रो सिर्जना ल्याइरहेको उनको भनाई छ । 

‘नयाँ पुस्ताले संगीतमा एकदमै राम्रो गरिरहनुभएको छ । नयाँ पुस्ताको कामलाई एकदमै प्रशंसा गर्छु’ उनी भन्छन् ‘हिट भएका गीतहरू एक/दुई वर्षमै स्रोता दर्शकले किन बिर्सिन्छन् भन्ने कुरा अध्ययन गर्दैछु ।’

गीतहरू रिलिजको केही समय हिट हुने र त्यसको चर्चा केही महिनामै हराउने क्रम देखिएको बताउँदै उनले अगाडि भने, ‘अब कस्तो खालको गीत गाउने, कस्तो गीत पब्लिकमा ल्याउने भन्ने अध्ययन गर्नुपर्यो ।’ 

प्रेमराजाका ‘पानको पात’, ‘बाँझो खेतमा’, ‘सिमसिमे पानीमा’, ‘हिउँचुलीमा हिउँ’ जस्ता रिल क्यासेट जमानाका गीत अहिलेसम्म पनि उत्तिकै हिट छन् । 

गतवर्ष उनले ल्याएको ‘बन्दीपुरैमा’बोलको गीतलाई पनि स्रोता दर्शकले रुचाएका थिए ।