भारतीय लोकसभामा प्रधानमन्त्री नरेन्द्र मोदीविरुद्ध अविश्वासको प्रस्ताव दर्ता भएसँगै अब छलफल अगाडि बढाइने भएको छ ।

भारतीय कांग्रेसका सांसद गौरव गोगाईले मोदी सरकारविरुद्ध प्रस्तुत गरेको अविश्वास प्रस्तावमा ५० सांसदले समर्थन जनाएपछि संसद्ले स्वीकार गरेको छ ।

अविश्वासको प्रस्तावलाई अगाडि बढाउनेबारे आज सभामुखले प्रमुख राजनीतिक दलसँग छलफल गर्ने भारतीय सञ्चारमाध्यमले जनाएका छन् । छलफलले अविश्वासको प्रस्तावमाथि छलफल थाल्ने मिति तय गर्नेछ । प्रस्तावमाथि आगामी हप्ता चर्चा हुने अनुमान छ ।

विपक्षी दलहरूले मणिपुरमा भएको हिंसामा मोदी सरकारलाई घेर्न खोजेका छन् । त्यसै रणनीतिअनुसार अविश्वासको प्रस्ताव दर्ता गरिएको छ । संसद्मा प्रस्तावमाथि छलफल भएर सरकारले जवाफ दिनेछ । त्यसपछि प्रस्तावलाई निर्णयार्थ पेश गर्दै पक्ष/विपक्षमा मतदान हुने समाचारमा जनाइएको छ ।

संसदीय अंकगणित हेर्दा मोदी सरकारसँग स्पष्ट बहुमत छ । सरकारी गठबन्धनसँग ३२९ सांसद रहेका छन् भने विपक्षमा १४२ सांसद मात्रै छन् । अविश्वासको प्रस्ताव असफल हुने निश्चित छ तर विपक्षी दलले मणिपुर हिंसाको घटनाबारे छलफल गराउन अविश्वास प्रस्ताव ल्याएका जनाइएको छ ।