अस्ट्रेलियाको भिसा रद्द भएको खबर फैलिएसँगै गायिका समीक्षा अधिकारीले आफ्नो धारणा सार्वजनिक गरेकी छन् ।​ बिहीवार दिउँसो फेसबुकमा स्टाटस लेख्दै समीक्षाले आफ्नो बदनाम गराउन खोजिएको बताएकी छन् । सत्य तथ्य नबुझी आफूमाथि प्रहार गरिएको उनको आरोप छ । 

‘अहिलेको मेरो भिसा निवेदनको स्थितिमा फाइनान्सको केही डकुमेन्ट थप गर्नुपर्ने स्थितिमा मैले पठाई सकेकी छु । भएको यति हो’ उनले भनेकी छन् । 

आफ्नो दिदी अस्ट्रेलियाको नियममा रहेर त्यहाँ पढ्दै गरेको समीक्षाले बताएकी छन् ।

उनले लेखेकी छिन् ‘म ब्ल्याक लिस्टमा परेको भन्ने खबर सरासर झुटो हो । मलाई अहिले तीज कार्यक्रमको लागी दिदी बहिनी इभेन्टले बोलाएको हो । म १८ वर्ष पुगिसकेको छु र मैले गार्जियन एप्लाई गरेको छु भन्ने कुरा सरासर झुटो हो । यस्ता भ्रामक समाचारमा विश्वास नगरिदिनुहुन विनम्र आग्रह गर्दछु ।’ 

समीक्षा गत वर्षको फागु पूर्णिमाको अवसरमा आयोजित साङ्गीतिक कार्यक्रमको सिलसिलामा अस्ट्रेलियाको सिड्नी पुगेकी थिइन् । ​

त्यसबेला उनको उमेर १८ वर्ष नपुगेकाले केयर–टेकरका रुपमा आफ्नी दिदीलाई पनि अस्ट्रेलिया लगेकी थिइन् । कार्यक्रमपश्चात समीक्षा नेपाल फर्किए पनि दिदी चाहिँ अष्ट्रेलियामै बसिन् । 

यसपटक अस्ट्रेलियामा समीक्षाको तीज विशेष कार्यक्रम तय छ ।