आज जनै पूर्णिमा । यो दिन एघारथरीका गेडागुडी मिसाइ भिजाएर टुसा उमारेर बनाइएको क्वाँटी खाने प्रचलन समेत रहेको छ । 

यसरी क्वाँटी बनाई खानाले शरीरमा रोग नलाग्ने, पेट सफा हुने र वर्षायामभर खेतीपातीको काम गर्दा शरीरमा लागेको चिसो निकाली भित्रदेखि नै तापको सञ्चार गर्छ भन्ने धार्मिक एवं आयुर्वेद शास्त्रीय मान्यता छ ।
 
विभिन्न थरी गेडागुडीको मिसाएर बनाइएको क्वाँटीको रस खाएमा शरीरमा रोग प्रतिरोधी क्षमता वृद्धि हुने आयुर्वेदका चिकित्सक डा वंशदीप शर्मा खरेलले बताए । यसबाट चिसो गाडिएर लाग्ने रुघाखोकीजस्ता रोग पनि निको हुने उनले बताए । 

टुसा उम्रिन समय लाग्ने भएकोले गेडागुडीलाई चाहिनेभन्दा बढी भिजाउने कतिपयमा आदत हुन्छ । यस्तै टुसा उम्रिन थालेपछि यो बिग्रने क्रम पनि सुरु हुन्छ । यत्तिकै राख्ने हो भने यो एक–दुई दिनमै गन्हाउन सुरु हुन्छ । तर तपाईंलाई यो भण्डारण गर्ने सही तरिका थाहा भयो भने यो लामो समयसम्म ताजा रहन सक्छ ।

गेडागुडीमा टुसा उम्रिसकेको छ भने यसलाई सफा पानीले राम्रोसँग धुँदा राम्रो हुन्छ । सफा पानीले धोएपछि यसलाई पङ्खाको हावामा सुकाउनु हितकर हुन्छ । 

यसैगरी क्वाँटीलाई प्लास्टिकको ब्यागमा लुज गरेर प्याक गर्ने र फ्रिजमा स्टोर गर्न पनि सकिन्छ । ब्यागमा हल्का हावा जान दिँदा पनि यो धेरै समयसम्म ताजा रहन्छ । 

टुसा उम्रिएको सबै गेडागुडीलाई एकै पटक प्याक गर्नुको साटो छुट्टा छुट्टै प्याक गर्न राम्रो हुन्छ ।  यसैगरी कागजको साटो अन्य कुनै कपडाको प्रयोग  गर्दा टुसा उम्रिएको गेडागुडी ब्याक्टेरिया र दुर्गन्धबाट टाढा रहनेछ । 

टुसा उम्रिएको गेडागुडीलाई लामो समयसम्म ताजा राख्नका लागि भिजाउने समयमा यसलाई हावादार स्थानमा राख्दा राम्रो हुन्छ ।