अन्तर रिक्रुटिङ एजेन्सी तथा जुनियर राष्ट्रिय ब्याडमिन्टन प्रतियोगिता अन्तर्गत 'अन्डर-१९ ब्वाइज सिंगल जुनियर' को उपाधि एपीएफका  क्षितिज खनालले जितेका छन्। 
शनिबार राजधानीमा भएको फाइनल खेलमा एपीएफकै रोशन साउदलाई हराउँदै खनाल च्याम्पियन बन्न सफल भएका हुन् ।

उपाधिसँगै एपीएफका खनालले प्रथम पुरस्कार २० हजार रुपैयाँ र ट्रफी, मेडल र प्रमाणपत्र हात पारे । दोस्रो भएका एपीएफकै रोशन साउदले १० हजार रुपैयाँ तथा तेस्रो भएका त्रिभुवन आर्मी क्लबका नरेन्द्र बम तेसी र नेपाल पुलिस क्लबका अभिक श्रेष्ठले नगद ५ – ५ हजार रुपैयाँ हात पारे ।

त्यस्तै रिक्रुटिङ एजेन्सी डबल्सतर्फ डेभिड एचआर प्रा.लिका विवेक कङ्दङ्वा र सुरेन्द्र कटुवालले जित हात पारे।
 उपाधिसँगै उनीहरुले प्रथम पुरस्कार ४० हजार रुपैयाँ र ट्रफी, मेडल र प्रमाणपत्र समेत हात पारे । 
दोस्रो भएका एचएमटी ओभरसिज प्रा.लि.का विकास महर्जन र तुलसी पुरीले २० हजार रुपैयाँ र ट्रफी मेडल र प्रमाणपत्र समेत हात पारे ।
 त्यस्तै तेस्रो भएका इमरल्ड ओभरससिज प्रा.लि.का संजय कपाली, हेमराज श्रेष्ठ र युनाइटेड इन्टरनेशनल प्रा.लि.का शुक्र पाख्रिन, इन्द्र मेहताले नगद १० – १० हजार रुपैयाँ हात पारे ।

प्रतियोगितामा नगद पुरस्कार, ट्रफी, मेडल र प्रमाणपत्र श्रम, रोजगार तथा सामाजिक सुरक्षामन्त्री शरतसिंह भण्डारीले प्रदान गरेका थिए। 

भदौ २२ गते देखि शुरु भएको उक्त खेल ललितपुरस्थित रिभाईभ लिजर पार्कको कभर्ड हलमा वैदेशिक रोजगार तामाङ व्यवसायी समाजले आयोजना भएको थियो।