कोशी प्रदेश सरकारको विषयलाई लिएर सत्ता गठबन्धनकै एक घटक नेपाली कांग्रेसमा आन्तरिक विवाद देखिएको छ । 

गठबन्धन दलका शीर्ष नेताको बैठकले नेकपा (माओवादी केन्द्र) संसदीय दलका नेता इन्द्रबहादुर आङ्बोलाई कोशीको मुख्यमन्त्री बनाउने सहमति गरेपछि कांग्रेसको डा शेखर कोइराला (संस्थापन इतर) पक्षका नेताहरू प्रतिपक्षी नेकपा (एमाले)सँग मिलेर सरकार बनाउन छलफलमा जुटेका छन् । 

कोइराला पक्षका सांसद केदार कार्कीले आफू मुख्यमन्त्री बन्नुपर्ने अडान राख्दै आएका छन् । उनले आफ्नो पक्षका केही सांसदको हस्ताक्षर देखाएर एमालेसँग छलफल गरिरहेका छन् । १२ जना सासदको हस्ताक्षर लिएर आउने वचन एमालेलाई उनले दिइसकेको बताइएको छ ।

‘उहाँले १२ जना सासदको हस्ताक्षर लिएर आउछौं भन्नुभयो,’ एमालेका प्रमुख सचेतक रेवतीरमण भण्डारीले भने, ‘मैले पनि हस्ताक्षर लिएर आउनुहोस्, छलफल गराैँला भनेँ ।’ 

सविधानको धरारा १६८ उपधारा ५ अनुसार सरकार बनाउनका लागि दलको ह्वीप लाग्दैन सोहीअनुसार बहुमत पुर्याउन चाहिने सांसद लिएर आफूहरू एमालेसँगको वार्ता र छलफलमा जुटिरहेको कार्कीनिकट सांसदले बताएका छन् । शुक्रवार बेलुकासम्ममा आफूहरूले ४७ सांसदको दाबी लिएर प्रदेश प्रमुख पर्शुराम खापुङसमक्ष जाने इतर पक्षले जनाएकाे छ ।

उता, कार्कीले भने एमालेसँग छलफल नगरेको दाबी गर्दै गठबन्धनको निर्णयबारे पनि आफूलाई थाहा नभएको बताए । ‘एमालेसँग मैले अहिले कुनै छलफल गरेको छैन,’ उनले भने, ‘गठबन्धनले इन्द्र आङ्बोलाई मुख्यमन्त्री बनाउने भन्ने विषय पनि मलाई जानकारी छैन । प्रधानमन्त्रीसँग पनि मेरो भर्खर कुरा भएको थियो । उहाँले निर्णय भएको कुरा मलाई जानकारी गराउनु भएन ।’

यता निवर्तमान मुख्यमन्त्री तथा एमाले कोशी प्रदेश संसदीय दलका नेता हिक्मतकुमार कार्कीले भने कांग्रेसले संस्थागत निर्णय गरेर आएको खण्डमा मात्रै आफूहरूले छलफल अगाडि बढाउने बताएका छन् । संस्थागत निर्णय नभए दुर्घटना हुन सक्ने भएकाले पहिलो चरणमा व्यक्तिले छलफल नगर्ने उनले स्पष्ट पारे । यद्यपि, केदार कार्कीले १२ जना लिएर आउने भन्ने विषयको पुष्टि भने उनले गरे । 

‘उहाँले १२ जना सांसद लिएर आउँछाैँ भन्नुभएको छ । मैले थप छलफल गरौंला भनेको छु,’ उनले भने, ‘हाम्रो पहिलो प्रयास संस्थागत निर्णय नै हो ।’ 

गठबन्धन दलको बिहीवार बसेको बैठकले माओवादी नेता आङ्बोलाई मुख्यमन्त्रीमा अगाडि सार्ने निर्णय गरेको छ ।